पूर्ववैमनस्यातून तरुणाचा खून

लोकमत न्यूज नेटवर्क

पुणे : आठ वर्षांपूर्वी झालेल्या भांडणाच्या रागातून तरुणाच्या डोक्यात कोयत्याने वार करून खून करण्याची घटना किरकटवाडी येथे घडली. याप्रकरणी हवेली पोलिसांनी दोघांना अटक केली आहे.

विराज ऊर्फ मोश्या राजेंद्र गब्दुले (वय २६) आणि अविनाश करंजावणे (वय २७, दोघे रा. किरकटवाडी) अशी त्यांची नावे आहेत. अतुल सुरेश मोरे (वय २४, रा. किरकटवाडी) असे खून झालेल्या तरुणाचे नाव आहे.

८ वर्षांपूर्वी झालेल्या भांडणावरून अतुल मारे याने तू माझ्या भावाला का मारले, म्हणून विराज याच्या मोटारसायकलचे नुकसान केले होते. मोटारसायकलचे नुकसान भरून दे, असे विराज व अविनाश याने अतुलला सांगितले होते. परंतु, अतुलने त्याला नकार दिला. किरकटवाडी येथील ऊर्जा डेअरीजवळ शनिवारी सायंकाळी अतुल बसला असताना दोघांनी कोयत्याने वार करून त्याचा खून केला. या घटनेची माहिती मिळताच उपविभागीय पोलीस अधिकारी राहुल आवारे, सई भोरे पाटील, पोलीस निरीक्षक सदाशिव शेलार यांनी घटनास्थळी भेट दिली. आरोपींच्या दोघासाठी विविध पथके तयार केली. घटनेनंतर १२ तासांच्या आत पोलिसांनी दोघांना अटक केली.

ही कामगिरी सहायक निरीक्षक नितीन नम, घोडपाटील, सहायक फाैजदार प्रदीप नांदे, अजित शिंदे, दिलीप शिंदे, हवालदार संजय शेडगे, रामदार बाबर व त्यांच्या सहकाऱ्यांनी केली.