नीरा-भीमा कारखान्याची निवडणूक बिनविरोध! माजी मंत्री हर्षवर्धन पाटलांचे सलग २५ वर्षे निर्विवाद वर्चस्व

राष्ट्रीय सहकारी साखर कारखाना महासंघाचे अध्यक्ष हर्षवर्धन पाटील यांचे निर्विवाद वर्चस्व सलग ५ व्या पंचवार्षिक निवडणुकीत कायम राहिले आहे.

लाखेवाडी: शहाजीनगर येथील निरा-भिमा सहकारी सहकारी साखर कारखान्याच्या सन २०२५-२६ ते २०३०-३१ या कालावधीच्या निवडणुकीमध्ये कारखान्याचे संस्थापक व राष्ट्रीय सहकारी साखर कारखाना महासंघाचे अध्यक्ष हर्षवर्धन पाटील यांचे निर्विवाद वर्चस्व सलग ५ व्या पंचवार्षिक निवडणुकीत कायम राहिले आहे. या कारखान्याच्या स्थापनेपासूनच्या २५ वर्षात सर्व निवडणुका बिनविरोध झाल्या आहेत. कारखान्याच्या निवडणुकीसाठी अर्ज मागे घेण्याच्या शेवटच्या दिवशी गुरुवारी (१३ मार्च) सर्व २१ उमेदवार बिनविरोध निवडून आले आहेत. 

'लोकमत'चं WhatsApp चॅनल फॉलो करा!

माजी मंत्री हर्षवर्धन पाटील त्यांनी सन १९९९ मध्ये नीरा-भीमा सहकारी साखर कारखान्याची स्थापना केली. त्यानंतर संस्थापक हर्षवर्धन पाटील यांच्या नेतृत्वाखाली सर्व निवडणुका बिनविरोध होत आहेत. 

नीरा-भीमा कारखान्याने स्थापनेपासून चांगले कामकाज करीत गेल्या २५ वर्षांमध्ये शेतकर्‍यांचा विश्वास संपादन केलेला आहे . तसेच सध्या देशातील व राज्यातील साखर कारखानदारी अडचणीत असल्याची जाण शेतकऱ्यांना आहे. या पार्श्वभूमीवर कारखाना कार्यक्षेत्रातील ४६ गावांमधील सभासदांनी व  कार्यकर्ते, पदाधिकाऱ्यांनी बिनविरोध निवडणुकीकरिता सहकार्याची भूमिका घेतली, त्याबद्दल हर्षवर्धन पाटील यांनी आभार व्यक्त केले.

हर्षवर्धन पाटील यांच्या नेतृत्वाखाली बिनविरोध निवडून आलेले उमेदवार

बावडा गट: हर्षवर्धन शहाजीराव पाटील, प्रतापराव सर्जेराव पाटील, उमेश अच्युतराव पाटील 

पिंपरी गट: प्रकाश शहाजी मोहिते, संजय तुळशीराम बोडके, विजय दत्तात्रय घोगरे.

सुरवड गट: महेशकुमार दत्तात्रय शिर्के, दादासो उत्‍तम घोगरे, सुभाष किसन गायकवाड 

काटी गट : लालासो देविदास पवार, राजकुमार वसंतराव जाधव, विलास रामचंद्र वाघमोडे 

रेडणी गट : आनंदराव नामदेव बोंद्रे, राजेंद्र व्यंकट देवकर, दत्तू यशवंत सवासे 

अनुसूचित जाती आणि जमाती प्रवर्ग: राहुल अरुण कांबळे 

इतर मागास प्रवर्ग: कृष्णाजी दशरथ यादव 

भटक्या विमुक्त जाती व जमाती विशेष मागास प्रवर्ग: रामचंद्र नामदेव नाईक 

ब वर्ग सभासद प्रवर्ग : भाग्यश्री हर्षवर्धन पाटील 

महिला राखीव प्रवर्ग: संगिता दत्तात्रय पोळ, कल्पना निवृत्ती शिंदे 

या निवडणुकीसाठी निवडणूक निर्णय अधिकारी म्हणून उपजिल्हाधिकारी कल्याण पांढरे व त्यांना सहाय्यक म्हणून इंदापूरचे तहसीलदार जीवन बनसोडे यांनी काम पहिले.

हर्षवर्धन पाटलांच्या प्रतिष्ठितेसाठी निवडणूकीतून माघार -उदयसिंह पाटील

कारखान्याची निवडणूक बिनविरोध होण्यासाठी विद्यमान संचालक उदयसिंह पाटील यांनी बावडा गटातून स्वतःचा उमेदवारी अर्ज मागे घेण्याचा निर्णय हा तहसील कार्यालयामध्येच शेवटच्या दोन मिनिटात घेतला. उदयसिंह पाटील यांनी बिनविरोध निवडणुकीसाठी आपला निर्णय कायम ठेवला. 

त्यानंतर हर्षवर्धन पाटील यांच्या निवासस्थानी भाग्यश्री बंगला येथे कार्यकर्त्यांसमोर बोलताना उदयसिंह पाटील यांनी सांगितले की, 'सध्या आपले नेते हर्षवर्धन पाटील हे विधानसभा निवडणुकीतील अपयशाने राजकीय पदावर नाहीत, त्यामुळे कारखाना निवडणूक बिनविरोध होणे हे राष्ट्रीय साखर संघाचे अध्यक्ष असलेले हर्षवर्धन पाटील यांच्या प्रतिष्ठितेसाठी आवश्यक होते.' 

'भाऊच्या राजकीय अडचणीच्या काळात तालुक्यातील सर्वच कार्यकर्त्यांनी पदासाठी वेळ प्रसंगी नाराज न होता एक पाऊल मागे घेण्याची गरज आहे', असे उदयसिंह पाटील यांनी सांगितले.

हर्षवर्धन पाटील यांनी सांगितले की, 'कोणाचेही अडचणीचे राजकीय दिवस कायम राहत नसतात. तसेच कारखान्याच्या पहिल्या संचालक मंडळाच्या बैठकीमध्ये उदयसिंह पाटील यांना तज्ञ संचालक म्हणून यावेळी घेतले जाईल.'