नवीन कांद्याच्या दरवाढीला ब्रेक

गेल्या महिन्यातच कांद्याची आवक घटली होती. त्यामुळे किरकोळ बाजारात कांद्याचा दर किलोला ७० रुपयांपर्यंत पोहोचला होता. त्यातच पाऊस नसल्यामुळे शेतकऱ्यांकडून नवीन कांद्याची लागवडही लांबली होती

पुणे : गेल्या महिन्यातच कांद्याची आवक घटली होती. त्यामुळे किरकोळ बाजारात कांद्याचा दर किलोला ७० रुपयांपर्यंत पोहोचला होता. त्यातच पाऊस नसल्यामुळे शेतकऱ्यांकडून नवीन कांद्याची लागवडही लांबली होती. परिणामी कांद्याला भाव १०० रुपयांचा आकडा गाठणार आणि कांदा पुन्हा एकदा सर्वसामान्यांच्या डोळ्यात पाणी आणणार, अशी चर्चा सुरू झाली होती. मात्र, बाजारात नवीन कांद्याची आवक सुरू झाल्याने कांद्याच्या दरवाढीला ब्रेक लागला आहे. संगमनेर, खेड, आंबेगाव, श्रीगोंदा, नगर येथून ६० ट्रक नवीन कांद्याची, तर ३० ते ४० ट्रक जुन्या कांद्याची आणि २ ट्रक इजिप्त कांद्याची आवक झाली. घाऊक बाजारात नवीन कांद्याला प्रतिदहा किलोला १५० ते ३०० रुपये दर मिळाला, तर जुन्या कांद्याला २५० ते ३२० रुपये दर मिळाला.
पाऊस आणि उष्णतेमुळे शेतातील भाजीपिकाचे नुकसान झाले असून नवरात्रोत्सवामुळेही काही प्रमाणात गुलटेकडी येथील श्री छत्रपती शिवाजी मार्केट यार्ड येथे भाजीपाल्याची आवक घटली आहे. त्यामुळे भेंडी, कोबी, शेवगा, गाजर, मटार, कारली, तोंडली, गाजर, यांच्या दरात सुमारे दहा टक्क्यांनी वाढ
झाली आहे.
नवरात्रोत्सव सुरू असल्याने तांबडा भोपळा आणि सुरण यांना ग्राहकांकडून चांगली मागणी आहे. उर्वरित भाजीपाल्याचे दर स्थिर आहेत, असे व्यापारी विलास भुजबळ यांनी रविवारी सांगितले.
गुलटेकडी, मार्केट यार्र्ड येथील बाजारामध्ये रविवारी तब्बल १५०-१६० ट्रक इतकी आवक झाली. परराज्यांतून आलेल्या मालामध्ये कर्नाटक आणि मध्य प्रदेश येथून १४ ते १५ टेम्पो हिरवी मिरची, कर्नाटक येथून ३ ते ४ ट्रक कोबी, आंध्र प्रदेश आणि तमिळनाडू येथून ३ ते ४ टेम्पो शेवग्याची आवक झाली. पुणे विभागातून सातारी आल्याची ५०० ते ५५० पोती, बेंगलोरी आल्याची २०० पोती, फ्लॉवरची १४ ते १५ टेम्पो, कोबीची १० ते १२ टेम्पो, टोमॅटोची ५ ते ५५०० हजार पेटी, सिमला मिरचीची ८ ते १० टेम्पो, भुईमूग शेंगांची २०० ते २५० पोती, मटारची ५० ते ६० गोणी, तांबडा भोपळ्याची १० ते १२ टेम्पो, जुन्या कांद्याची ५ ते ६ ट्रक, नवीन कांद्याची ५० ते ६० ट्रक, इजिप्त कांद्याची २ ट्रक, तळेगाव, वाठार बटाट्याची सुमारे १० हजार गोणी, तर आग्रा, इंदौर येथून बटाट्याची ३० ते ३५ ट्रक, मध्य प्रदेश येथून लसणाची ३ हजार गोणींची आवक झाली. येत्या आठवड्यात नवीन कांद्याची आवक आणखी वाढणार आहे. परिणामी पुढील काळात कांद्याचे दर स्थिर राहतील, असे व्यापारी रितेश पोमण यांनी सांगितले.
पालेभाज्यांना मागणी घटली; कोथिंबिरीच्या दरात वाढ
नवरात्रोत्सव सुरू असल्याने पालेभाज्यांची मागणी घटली आहे. मागणीच्या तुलनेत आवक वाढल्याने मेथीच्या दरात शेकडा जुडीमागे एक हजार रुपयांनी, पालकच्या दरात प्रत्येकी ४०० रुपयांनी आणि अंबाडीच्या दरात २०० रुपयांनी घसरण झाली आहे. मात्र,कोथिंबिरीच्या दरात शेकडा जुडीमागे २०० रुपयांनी वाढ झाली आहे, असे व्यापाऱ्यांनी सांगितले. गुलटेकडी येथील श्री छत्रपती शिवाजी मार्केट यार्ड येथील बाजारात रविवारी कोथिंबिरीची सुमारे १ लाख २५ हजार जुडी, तर मेथीची ३० हजार जुडी आवक झाली.
फळभाज्यांचे दहा किलोचे दर : कांदा जुना ३०० - ४००, नवा : २००-३००, इजिप्त २४०-३००, बटाटा : ८० - ११०, लसूण ५००- ९००, आले सातारी ३५०, बंगलोर : ३००, भेंडी ४००-४५०, गवार : गावरान ४००-५००, सुरती ४००-५००, टोमॅटो ८० -१२०, दोडका ३०० -४००, हिरवी मिरची १००-५५०, दुधी भोपळा १००-१८०, चवळी २०० -२५०, काकडी १२० -१८०, कारली : हिरवी ३०० -३५०, पांढरी १००- १८०, पापडी ३००-३५०, पडवळ १५० - १८०, फ्लॉवर ८० - १२०, कोबी ५०-१००, वांगी १५० -२००, डिंगरी २०० - २५०, नवलकोल १२०-१५०, ढोबळी मिरची १८०-२२०, तोंडली : कळी २२०-२५०, जाड : १०० -११०, शेवगा ५००-५५०, गाजर : २५०-२८०, वालवर ३००-४००, बीट ८० - १००, घेवडा ४००-४५०, कोहळा १००-१५०, घोसावळे १५० -२००, ढेमसे १६० -१८०, भुईमुग शेंग ३००-४००, मटार : स्थानिक ९००-१०००, पावटा ४०० -५००, तांबडा भोपळा ६०-१२०, सुरण २४०-२५०, नारळ १०००-१२००, मका कणीस शेकडा २००-३००, प्रति १० किलो : ६०-१००.
पालेभाज्यांचे शेकड्याचे दर : कोथिंबीर ८०० - १२००, मेथी ५०० - १०००, शेपू ५०० - १०००, कांदापात ५०० - ८००, चाकवत ५०० - ६००, करडई ५०० - ६००, पुदिना ३००-३४००, अंबाडी ५००-६००, मुळा ५००-६००, राजगिरा ७००-८००, चुका ३०० - ५००, चवळई ७०० - ८००, पालक ६००-८००.