धक्कादायक! पुण्यात कचऱ्यात सापडले नवजात अर्भक, सिंहगड रस्ता परिसरातील घटना

याबाबत सिंहगड रस्ता पोलिसांना माहिती मिळताच पोलिसांनी घटनास्थळी जाऊन अर्भक ताब्यात घेऊन ससूनला पाठविले आहे....

धायरी (पुणे) : सिंहगड रस्ता परिसरातील धायरी फाटा येथील सणस शाळेजवळील लाडली साडी सेंटर या दुकानापुढे मुख्य रस्त्यावर कचऱ्यात पुरुष जातीचे एक नवजात अर्भक मृत अवस्थेत सापडल्याने एकच खळबळ उडाली आहे. याबाबत सिंहगड रस्ता पोलिसांना माहिती मिळताच पोलिसांनी घटनास्थळी जाऊन अर्भक ताब्यात घेऊन ससूनला पाठविले आहे. 

याबाबत मिळालेली माहिती अशी की, आज शुक्रवारी सकाळी आठ वाजण्याच्या सुमारास एका कचरावेचकला कचऱ्यात हे नवजात अर्भक दिसून आले. त्यांनी लागलीच याबाबत पोलिसांना माहिती दिली. पोलिसांनी तातडीने घटनास्थळी पोहचून पाहिले असता, ते नवजात अर्भक मृत अवस्थेत आढळून आले. पोलिसांनी ते अर्भक ससून रुग्णालयात पाठविले असून सिंहगड रस्ता पोलीस ठाण्यात याप्रकरणी गुन्हा दाखल करण्याचे काम सुरू आहे. याबाबत पोलिसांनी या घटनेचा तपास सुरू केला असून हे बाळ कोणाचं आहे आणि असे कोण निर्दयी आई-बाबा आहे ज्यांनी पोटच्या गोळ्याला असं फेकून दिलं याचा आता पोलीस शोध घेत आहेत.

दरम्यान, घटनेविषयी अधिक माहिती मिळवण्यासाठी पोलीस स्थानिकांची आणि प्रत्यक्षदर्शींची चौकशी करणार असल्याची माहिती आहे. तर हे अर्भक कचराकुंडीत कोणी फेकलं हे शोधण्यासाठी पोलीस परिसरातील सीसीटीव्ही तपासणार आहेत. पण पोटच्या बाळाला अशा प्रकारे फेकल्यामुळे संपूर्ण परिसरात खळबळ उडाली असून नाराजी पसरली आहे. पुढील तपास सिंहगड रस्ता पोलिस करत आहे.