नवोदित अभिनेत्रीचा पुण्यात भररस्त्यात गोंधळ, महिला पोलिसाच्या बोटाला चावा

वडगाव शेरीतील घटना; हाॅटेलचालकाशी वाद...

पुणे : हाॅटेलचालकाशी वाद झाल्याने भरस्त्यात नवोदित अभिनेत्रीने गोंधळ घातल्याची घटना वडगाव शेरी भागात घडली. तिला समजावून सांगणाऱ्या महिला पोलिसाच्या बोटाला चावा घेतला. सरकारी कामात अडथळा आणणे तसेच महिला पोलिसाच्या बोटाला चावा घेतल्या प्रकरणी नवोदित अभिनेत्रीला अटक करण्यात आली.

ही २८ वर्षाची नवोदित अभिनेत्री मुळची बंगळुरु येथील राहणारी असून सध्या अंधेरी येथे राहते. याबाबत विमानतळ पोलीस ठाण्याच्या महिला पोलीस अंमलदारांनी चंदननगर पोलीस ठाण्यात फिर्याद दिली आहे. आरोपी तरुणी अभिनेत्री असून तिने काही वेबसिरीजमध्ये छोट्या भूमिका केली आहे. ती कामाच्या शोधात असून ती पुण्यात कामानिमित्त आली होती. तिने वडगाव शेरी परिसरातील एक हाॅटेलमधील खोली ऑनलाइन आरक्षित केली होती. खोली सुविधा तिला आवडल्या नाहीत. त्यामुळे तिने पैसे परत मागितले.

या कारणावरुन तिने हाॅटेलमधील कर्मचाऱ्यांशी वाद घालण्यास सुरुवात केली. या घटनेची माहिती हाॅटेल व्यवस्थापनाने पोलिसांना दिली. महिलांच्या सुरक्षेसाठी स्थापन केलेल्या दामिनी पथकातील महिला पोलीस तेथे गेल्या. त्यांनी तिला समजावून सांगण्याचा प्रयत्न केला. हाॅटेलसमोरील रस्त्यावर गोंधळ घालणाऱ्या या अभिनेत्रीला महिला पोलिसांनी गाडीत बसण्यास सांगितले. त्या वेळी दामिनी पथकातील महिला पोलीस मार्शलशी वाद घालून झटापट केली. तिने या महिला पोलिसांच्या बोटाचा चावा घेतला. सरकारी कामात आणणे तसेच दुखापत केल्या प्रकरणी तिला अटक करण्यात आली. पोलीस उपनिरीक्षक मंजुषा मुळुक तपास करत आहेत.