अमित शहा, एकनाथ शिंदे, देवेंद्र फडणवीस यांच्याविषयी फेसबुकवर अश्लिल मजकूर

सायबर पोलिसांनी केला बदनामीचा गुन्हा दाखल

पुणे : केंद्रीय गृहमंत्री अमित शहा, मुख्यमंत्री एकनाथ शिंदे, उपमुख्यमंत्री देवेंद्र फडणवीस यांच्याविषयी बदनामीकारक व अश्लिल मजकूर फेसबुकवरील हिंदू एकता ग्रुप वर पोस्ट करण्यात आला आहे. याप्रकरणी सायबर पोलिसांनी बदनामीचा गुन्हा दाखल केला आहे. याप्रकरणी भारतीय जनता पक्षाचे माहिती-तंत्रज्ञान सेलचे विनित भरतकुमार बाजपेयी (वय ३९, रा. धानोरी) यांनी सायबर पोलीस ठाण्यात फिर्याद दिली आहे. त्यानुसार हिंदू एकता ग्रुपवर पोस्ट करणारे रामदास शिर्के याच्यावर बदनामीचा गुन्हा दाखल करण्यात आला आहे.

याबाबत पोलिसांनी दिलेल्या माहितीनुसार, फेसबुकवर हिंदू एकता नावाने ग्रुप आहे. त्यात नाट्यरुपाने काही संवाद देण्यात आले आहेत. त्यात केंद्रीय गृहमंत्री अमित शहा, महाराष्ट्राचे मुख्यमंत्री एकनाथ शिंदे, उपमुख्यमंत्री देवेंद्र फडणवीस यांचे संवाद देण्यात आले आहेत. नाट्यरुपांतर केलेल्या या संवादामध्ये आक्षेपार्ह आणि अश्लिल मजकूर देण्यात आला आहे. मान्यवरांच्या घटनात्मक व राजकीय प्रतिष्ठितांचे लौकिकास बाधा येईल, असा मजकूर आहेत. त्यामुळे बदनामी करणारा मजकूर प्रसारित केल्याने गुन्हा दखल करण्यात आला आहे. याबाबत वरिष्ठ पोलीस निरीक्षक मिनल सुपे पाटील यांनी सांगितले की, फेसबुकवरील हिंदू एकता ग्रुपवर ही पोस्ट टाकण्यात आली आहे. त्याची माहिती फेसबुककडून मागविण्यात आली आहे.