Pune: वीजबिल भरण्याचा बहाणा करून एकाची फसवणूक, वाघोली परिसरातील घटना

सायबर चोरट्याने महावितरणचे कर्मचारी बोलत असल्याचे भासवून तब्बल ९४ हजारांचा गंडा घातला आहे....

पुणे : महावितरण वीजबिल भरण्याचे बाकी आहे असे सांगून सायबर चोरट्यांनी वाघोली परिसरात राहणाऱ्या एका व्यक्तीची फसवणूक केल्याची घटना घडली आहे. सायबर चोरट्याने महावितरणचे कर्मचारी बोलत असल्याचे भासवून तब्बल ९४ हजारांचा गंडा घातला आहे.

अधिक माहितीनुसार हा प्रकार बुधवारी (दि. ०६) घडला आहे. वाघोली परिसरात राहणाऱ्या ३१ वर्षीय युवकाने लोणीकंद पोलिसांना फिर्याद दिली आहे. त्यानुसार तक्रारदार यांच्या वडिलांना एका अनोळखी क्रमांकावरून फोन आला. महावितरणकडून कर्मचारी बोलत असल्याचे भासवून तुमचे मागील महिन्याचे वीजबिल भरायचे बाकी आहे, लवकर भर अन्यथा आजच तुमची विज बंद होईल असे सांगितले. त्यांनतर वीजबिल भरण्याचा बहाणा केला.

बिल भरण्यासाठी एक अप्लिकेशन डाउनलोड करण्यास सांगितले. अप्लिकेशनचा वापर करून मोबाईलचा रिमोट ऍक्सेस मिळवला. खासगी माहितीचा वापर करून फिर्यादींच्या बँक खात्यातून ९४ हजार रुपये परस्पर ट्रान्स्फर करून घेतले. फसवणूक झाल्याचे लक्षात येताच फिर्यादींनी पोलीस ठाण्यात धाव घेत झालेल्या प्रकारचा जबाब दिला. याप्रकरणी लोणीकंद पोलीस ठाण्यात गुन्हा दाखल करण्यात आला आहे.