भुसार बाजारात ट्रकच्या चाकाखाली सापडून एकाचा मृत्यू

पुणे : मार्केटयार्डातील भुसार बाजारात ट्रकच्या चाकाखाली सापडून ट्रकचालकाचा सहकारी क्लिनरचा मृत्यू झाल्याची घटना घडली. याप्रकरणी ट्रकचालकाविरोधात मार्केट यार्ड पोलिसांनी गुन्हा दाखल केला आहे.

शामलाल सुकराम सोलंकी (रा. भामासर, बिकानेर, जि. राजस्थान) असे मृत्युमुखी पडलेल्या क्लिनरचे नाव आहे. ट्रकचालक रामदयाल सीताराम सारंग (वय ३५, रा. भामासर, बिकानेर, जि. राजस्थान) याला अटक करण्यात आली. धीरज कसबे याने मार्केटयार्ड पोलीस ठाण्यात फिर्याद दिली आहे. मार्केट यार्डातील भुसार बाजारात राजस्थानाहून भुसार माल घेऊन शनिवारी दुपारी ट्रक आला होता. भुसार बाजारातील पेढीवर ट्रकमधील माल उतरविण्यात येणार होता. त्या वेळी ट्रकचालक सारंग ट्रकमागे घेत होत होता. ट्रकमधील क्लिनर सोलंकी ट्रकचालक सारंगला ट्रक मागे घेण्याबाबत सूचना देत होता.

त्या वेळी त्याने ट्रक थांबविण्याचा इशारा केला. ट्रकचालक सारंगने दुर्लक्ष करून ट्रकमागे नेला. त्यावेळी ट्रकच्या चाकाखाली सोलंकी सापडून त्याचा जागीच मृत्यू झाला. पोलीस उपनिरीक्षक भोसले तपास करत आहेत.