पुण्यात मध्यरात्री बसची धडक, दोन अपघातात एक ठार 1 जखमी  

पुणे-नगर रस्त्यावर रात्री 12 वाजून 30 मिनिटांच्या सुमारास खासगी लक्झरी बसला अपघात झाला. येथील शास्त्री नगर चौक (कल्याणीनगर चौक) येरवडा पोलीस ठाण्याच्या पुढे एका बसचालकाचे गाडीवरील नियंत्रण सुटल्याने रस्त्याच्या कडेला असलेल्या विजेच्या खांबावर ही बस आदळली.

पुणे - पुणे-नगर रस्त्यावर रात्री 12 वाजून 30 मिनिटांच्या सुमारास खासगी लक्झरी बसला अपघात झाला. येथील शास्त्री नगर चौक (कल्याणीनगर चौक) येरवडा पोलीस ठाण्याच्या पुढे एका बसचालकाचे गाडीवरील नियंत्रण सुटल्याने रस्त्याच्या कडेला असलेल्या विजेच्या खांबावर ही बस आदळली. यामध्ये विजेचा खांब वाकला असून, बस शेजारच्या सोसायटीच्या भिंतीला धडकली. त्यामध्ये बसचे मोठे नुकसान झाले आहे. या घटनेत जीवितहानीची माहिती मिळू शकली नाही. घटनेची माहिती मिळताच घटनास्थळी येरवडा पोलिसांनी धाव घेतली. 

शहरातील अपघाताच्या दुसऱ्या घटनेत चंदन नगरच्या मुख्य चौकात (नवोदय विद्यालय) बीआरटी मार्गाच्या दुभाजकाला खासगी मिनी बसने रात्री पावणेएकच्या सुमारास जोरात धडक दिली. या घटनेत एक जण जागीच ठार झाल्याचे माहिती असून, आणखी एक जण गंभीर जखमी झाला आहे. दरम्यान, घटनास्थळी चंदननगर पोलीस आणि अग्निशमन एक गाडी दाखल झाली. त्यानंतर, त्यांनी तातडीने मदतकार्य सुरू केले असून जखमीला रुग्णालयात दाखल केले आहे.