ऑनलाइन ‘पिफ’ला सुरुवात

पुणे फिल्म फाउंडेशन आणि महाराष्ट्र सरकार यांच्या वतीने १९वा ऑनलाइन ‘पिफ’ २५ मार्चपर्यंत रंगणार आहे. महोत्सवात जगातील उत्तम २६ चित्रपटांचा आस्वाद घेता येणार आहे. ‘लैला इन हैफा’ या चित्रपटाच्या प्रदर्शनाला गुरुवारी सायंकाळी साडेसहा वाजता सुरुवात झाली. या चित्रपटाची लिंक आठ तासांसाठी खुली होती. याप्रमाणे प्रत्येक चित्रपट सादरीकरणाच्या वेळेपासून आठ तासांत कधीही पाहता येणार आहे. चित्रपट पाहणाऱ्या व्यक्तीच्या नावाचा वाॅटरमार्क दिसत असल्याने चित्रपटाचे छायाचित्रण, तसेच स्क्रीनशॉट घेता येणे शक्य नाही. प्रेक्षकांना एका वेळी एकाच डिव्हाइसवर लॉगइन करता येणार आहे. दिवसात चार चित्रपट अपलोड केले जाणार आहेत.

ऑनलाइन पद्धतीने चित्रपट दाखवताना पायरसी टाळण्यासाठी कान, बर्लिन, व्हेनिस येथील आंतरराष्ट्रीय महोत्सवात वापरण्यात आलेल्या न्यूझीलंड येथील ‘शिफ्ट ७२’ या ऑनलाइन प्रणालीचा ‘पिफ’च्या निमित्ताने भारतात पहिल्यांदाच वापर होत आहे. यामध्ये कोणत्याही सॉफ्टवेअरच्या साह्याने चित्रपट जतन किंवा चित्रण करणे शक्य होणार नाही. नव्याने सहभागी होऊ इच्छिणाऱ्या प्रेक्षकांसाठी www.piffindia.com या वेबसाइटवर माहिती उपलब्ध आहे.