किसान योजनेतील बोगस लाभार्थ्यांकडून केवळ ७८ लाख १५ हजार वसुल

लोकमत न्यूज नेटवर्क

पुणे : प्रधानमंत्री किसान योजनेतील पुणे जिल्ह्यातील १६ हजार ११८ बोगस लाभार्थ्यांकडून त्याच्या बँक खात्यात जमा केलेली तब्बल १५ कोटी ३८ लाख ४० हजार रुपये वसुल करण्याचे आदेश केंद्र शासनाने दिले आहेत. पुणे जिल्ह्यात वसुलीला खूपच कमी प्रतिसाद मिळाला आहे. आतापर्यंत केवळ ७८ लाख १५ हजार रुपयेच वसुल झाले आहेत.

केंद्र शासनाने गरीब व सर्वसामान्य शेतकऱ्यांना मदत करण्यासाठी फेब्रुवारी २०१९ मध्ये प्रधानमंत्री किसान सन्मान निधी योजना सुरु केली होती. काही दिवसांपूर्वी तामिळनाडूमध्ये या योजनेत मोठा घोटाळा झाल्याचे उघड झाले होते. त्यानंतर केंद्र शासनाने सर्वच राज्यातील बोगस लाभार्थी शोधण्याचे आदेश दिले. देशातील अल्प भूधारक शेतकरी व पाच ऐकर व त्यापेक्षा कमी जमिन असणाऱ्या शेतकऱ्यांना केंद्र शासनाकडून प्रधानमंत्री किसान सन्मान निधी योजने अंतर्गत दर वर्षी ६ हजार रुपये जमा केले जातात. पुणे जिल्ह्यात आतापर्यंत या योजने अंतर्गत ५ लाख ३१ हजार शेतकऱ्यांची ऑनलाईन नोंद केली आहे. यामध्ये तब्बल १६ हजार ११८ शेतकरी सरकारी नोकर, टॅक्स भरणारे मोठे व्यवसायिक, अनेक मयत व्यक्तींचा देखील समावेश झाला असल्याचे समोर आले आहे. या अपात्र लोकांच्या बँक खात्यात आता पर्यंत तब्बल १५ कोटी ३८ लाख ४० हजार रूपये जमा केले असून, या सर्व पैशांची पुन्हा वसुल करण्याचे आदेश केंद्र शासनाने दिले आहेत. त्यानुसार जिल्हयातील सर्व तलाठी व संबंधित कर्मचाऱ्यांना तपासणी करण्याचे आदेश दिले आहेत. या सर्व बोगस लाभार्थ्यांकडून त्याच्या बँक खात्यात जमा केलेले पैसे पुन्हा वसुल करण्याची प्रक्रिया गेल्या दोन महिन्यांपासून सुरू आहे. परंतु, याला खूपच कमी प्रतिसाद मिळत असून, आतापर्यंत १५ कोटी ३८ लाखांपैकी केवळ ७८ लाख रुपयेच वसुल झाले आहेत.