कोविड वॉररूम हेल्पलाईनच्या दहापैकी एकच क्रमांक सुरू

पुणे : पुणे महापालिकेच्या कोविड वॉररूमद्वारे (टेलिफोनिक कॉल सेंटर) रुग्णालयातील बेड मिळविण्यासाठी जाहीर करण्यात आलेल्या, दहा टेलिफोन लाईनपैकी केवळ एकच क्रमांक चालू असल्याचे शुक्रवारी महापालिकेच्या आयटी व टेलिफोन विभागाकडून स्पष्ट केले आहे़ त्यामुळे आत्तापर्यंत नागरिकांच्या सोयीसाठी २४ तास महापालिकेच्या वॉररूममध्ये दहा संपर्क उपलब्ध करून देण्यात आल्याची पदाधिकाऱ्यांसह इतर विभागांनी दिलेली माहिती पूर्णत: चुकीची निघाली असून, ०२०-२५५०२११० हा क्रमांक वगळता इतर सर्व क्रमांक वारंवार व्यस्तच लागत आले आहेत़

दरम्यान, आजपर्यंत किंबहुना कोरोना आढावा बैठकीसाठी आज (दि. १६) तयार केलेल्या साप्ताहिक अहवालामध्येही महापालिकेने कोविड वॉररूम कॉल सेंटरचे पुन्हा पाच हेल्पलाईन क्रमांक जाहीर करून तीच चूक केली आहे़ प्रत्यक्षात मात्र ०२०-२५५०२११० हा क्रमांक वगळता इतर सर्व क्रमांक हे अंतर्गत म्हणजेच हंटिंग लाईन आहेत़

महापालिकेच्या आयटी विभागाने (माहिती व तंत्रज्ञान विभाग) दिलेल्या माहितीनुसार, कॉल सेंटरकरिता दूरध्वनी विभागामार्फत ०२०-२५५०२११० ही मुख्य हेल्प लाईन कार्यान्वित करण्यात आली आहे़ या लाईनवरती १० दूरध्वनी लाईन्स मागणीनुसार त्वरित कार्यान्वित केल्या आहेत़ त्यामुळे ०२०-२५५०२११० या क्रमांकावर फोन आल्यास तो इतर दहा क्रमांकापैकी १० पैकी जी लाईन फ्री आहे त्यावर वर्ग होतो. परंतु, हेल्पलाईनचे १० ही नंबर जाहीर केले गेल्यामुळे, त्या त्या वैयक्तिक नंबरवर फोन केल्यास ते फोन क्रमांक वारंवार व्यस्तच लागत आले आहेत़ तसेच वॉररूममध्येही पुरेसा सेवक वर्ग कार्यरत नसल्यामुळेही नागरिकांच्या दूरध्वनींना उत्तर देण्यासाठी ते उचलले जात नाहीत किंवा ते व्यस्त लागत आहेत़ त्यामुळे वॉररूमध्ये अधिकचा सेवक वर्ग उपलब्ध करून द्यावा, अशी मागणीही आयटी व टेलिफोन विभागाने आरोग्य विभागाकडे केली आहे़

---------------------------------