हॉटेलवर अतिक्रमण कारवाई ; विरोध म्हणून ‘भाऊ’ चढला ना मग ‘टॉवर’ वर 

आपल्यावर जाणुनबुजुन कारवाई केल्याचा आरोप या युवकाने करीत टॉवरवर चढुन आंदोलन सुुरु केले आहे

ठळक मुद्देनगरपालिका प्रशासनाचे युवकाला विनंतीपत्रदुपारी उशिरापर्यंत हा युवक मनोऱ्यावरुन खाली न उतरण्याच्या भुमिकेवर होता ठाम

बारामती : शहरात नववर्षाच्या स्वागताची तयारी सुरु असतानाच एका घटनेमुळे खळबळ उडाली आहे.बारामती नगरपालिका प्रशासनाने केलेल्या अतिक्रमण कारवाईच्या विरोधात हॉटेल व्यवसाय करणारा युवक भिगवण रस्त्यालगत असणाऱ्या मोबाईल टॉवरवर चढुन बसला आहे. शहरातील इतर अतिक्रमण दुर्लक्षित करुन आपल्यावर जाणुनबुजुन कारवाई केल्याचा आरोप या युवकाने करीत टॉवरवर चढुन आंदोलन सुुरु केले आहे.

प्रशांत दादा सरतापे असे या युवकाचे नाव आहे.शहरातील शिवाजी चौकात त्याचे हॉटेल गणेश आहे. काही दिवसांपुर्वी नगरपालिका प्रशासनाने शहरातील अतिक्रमणांवर कारवाई केली.यावेळी सरतापे याच्या हॉटेलवर देखील कारवाई करण्यात आली.मात्र, शहरात इतर अतिक्रमणांकडे नगरपालिका प्रशासन दुर्लक्ष करत असुन मला जाणुनबुजुन त्रास दिला जात असल्याचा आरोप करत सरतापे हा युवक आज सकाळी १० वाजता मोबाईलच्या टॉवरवर चढुन बसला. नगरपालिकेसह पोलीस प्रशासनाने हॉटेलवरील कारवाई मागे घ्यावी, ,शहरातील इतर अतिक्रमणांवर कारवाई करावी,अशा मागण्या करत त्या युवकाने टॉवरवर चढुन आंदोलन सुरु केले. मागण्या मान्य न झाल्यास टॉवर वरुन उडी मारण्याचा इशारा देखील या युवकाने दिला.त्यामुळे पोलीस प्रशासन,नगरपालिका प्रशासनाची धावपळ उडाली. सहायक पोलीस निरीक्षक निलेश अपसुंदे, बारामती नगरपालिका प्रशासनाने आरोग्य निरीक्षक राजेंद्र सोनवणे, अतिक्रमण विभाग प्रमुख सुनील धुमा ,महेश आगवणे आदी कर्मचारी तत्काळ या ठीकाणी पोहचले.सर्वांनी या युवकाला खाली उतरण्याचे आवाहन केले.मात्र, युवकाने लेखी आश्वासन दिल्याशिवाय खालीउतरणार नसल्याची ठाम भुमिका घेतली. त्यातच बारामतीचे मुख्याधिकारी योगेश कडुसकर हे रजेवर आहेत.त्यामुळे प्रशासनाने बारामती चे प्रभारी असलेले दौंड नगरपरीषदेचे मुख्याधिकारी विजय थोरात यांच्या स्वाक्षरीचे पत्र मागविण्यात आले.त्या पत्राची प्रिंट युवकाच्या आईच्या स्वाधीन करण्यात आली.त्यानंतर या युवकाला मोबाईलवर लेखी पत्र वाचुन देखील दाखविण्यात आले. त्यानंतर या युवकाला मोबाईलवर लेखी पत्र वाचुन देखील दाखविण्यात आले. त्याच्या आईने देखील प्रशासनाने जाणुनबुजुन कारवाई केल्याचा आरोप केला आहे.

मात्र, त्यांनतर देखील बारामतीचे मुख्याधिकारी कडुसकर यांच्याच हातुन पत्र स्वीकारणार असल्याची भुमिका घेत युवकाने खाली उतरण्यास नकार दिला आहे.नगरसेवक नवनाथ बल्लाळ,नगरसेवक गणेश सोनवणे यांनी या ठिकाणी धाव घेत या युवकाची समजुत घालण्याचा प्रयत्न सुरु ठेवला आहे.मात्र, दुपारी उशिरापर्यंत हा युवक मनोऱ्यावरुन खाली न उतरण्याच्या भुमिकेवर ठाम होता. मनोऱ्यावर चढलेल्या युवकाला पाहण्यासाठी नागरिकांनी मोठी गर्दी केल्याचे चित्र होते.
———————————————
नगरपालिका प्रशासनाचे युवकाला विनंतीपत्र 
शिवाजी चौक येथील येथील चहा,भजीपाव,वडापाव विक्री केल्या जाणाऱ्या हॉटेल मालक हे दुकान काढणे बाबत कारवाई केली जाणार ना. शहरातील विविध अतिक्रमणे काढणेबाबत नगरपालिका नियमानुसार कारवाई करेल. घरपट्टी आकारणीबाबत नगरपरिषद नियमबध्द कार्यवाही करत आहे.टॉवरवरुन उतरुन आंदोलन रद्द करावे, ही विनंती,असे पत्र युवकाला देण्यात आले आहे.