भटकळवाडीत रेल्वे मोजणीला विरोध

लोकमत न्यूज नेटवर्क

वडगाव कांदळी : पुणे-नाशिक हायस्पीड रेल्वेच्या सर्वेक्षणाचे काम सुरू असून मंगळवारी (दि.१०) भटकळवाडी (ता. जुन्नर) येथे जमिनीची प्रत्यक्ष मोजणी करण्यासाठी आलेल्या रेल्वे अधिकारी व इतर शासकीय अधिकाऱ्यांना शेतकऱ्यांनी जमिनीची मोजणी करून न देता माघारी पाठवले. जुन्नर तालुक्यात या प्रकल्पाला शेतकऱ्यांचा विरोध कायम आहे.

भूसंपादन प्रक्रियेसाठी प्रत्यक्ष जमीनीची मोजणी करण्यासाठी भटकळवाडी येथे महारेलचे उपमहाव्यवस्थापक शिरोळे, व्यवस्थापक मंदार विचारे, समन्वयक चंद्रकिशोर भोर, मंडलाधिकारी, तलाठी यांच्यासह कृषी विभागाचे अधिकारी, सार्वजनिक बांधकाम विभाग जुन्नर, पाणीपुरवठा विभागाचे अभियंता हे सर्वजण शेतकऱ्यांच्या संभाव्य नुकसानीची प्रत्यक्ष पाहणी व पंचनामे करण्यासाठी भटकळवाडी या ठिकाणी मंगळवारी (दि.१०) आले होते. यावेळी शेतकऱ्यांनी मोजणी करण्यास विरोध करत माघारी पाठविले. जुन्नर तालुक्यातील नारायणगाव, हिवरे तर्फे नारायणगाव, वडगाव कांदळी, नगदवाडी, भटकळवाडी, आळे, कोळवाडी, संतवाडी या गावातून पुणे-नाशिक हायस्पीड रेल्वे जात आहे. यासाठी महारेलने मोजणीची प्रक्रिया सुरू सुरू केली आहे. परंतु शेतकऱ्यांना जमिनीचा मोबदला किती? याबाबत कोणतीही पूर्वकल्पना दिलेली नाही. यामुळे या प्रकल्पाला आम्ही जमिनी देणार नसल्याची ठाम भूमिका शेतकऱ्यांनी लावून धरल्याने महारेलचे अधिकारी व मोजणी अधिकारी यांना मोजणी न करता माघारी जावे लागले. यावेळी रेल्वेविरोधी शेतकरी संघर्ष कृती समितीचे जिल्हाध्यक्ष नीलेश भुजबळ, कृती समितीचे पदाधिकारी अनिल वाघुले, गणेश वाजे, शरद पिंगळे, वैभव शिंदे, अजित सहाने, सुरेश भुजबळ, दिनेश शिंदे, अविनाश गणगे, वसंत कुराडे, गेनभाऊ हुलवळे, शिवदास खोकराळे, शरद गाढवे, शेखर भुजबळ, गणेश गुंजाळ, पुणे जिल्हा शेतकरी संघटनेचे अध्यक्ष अंबादास हांडे आदी शेतकरी मोठ्या संख्येने उपस्थित होते.

जुन्नर तालुक्यातून रेल्वेला मोठा विरोध

जुन्नर तालुक्यातील नारायणगाव, हिवरे तर्फे नारायणगाव, नगदवाडी, वडगाव कांदळी, भटकळवाडी, आळे, कोळवाडी, संतवाडी या गावांमधून हायस्पीड रेल्वे जात आहे. अनेक ठिकाणी बागायती क्षेत्र असल्याने अनेक शेतकरी अल्पभूधारक आहेत. यामुळे प्रकल्पाला शेतकरी विरोध करीत आहेत. हिवरे तर्फे नारायणगाव,वडगाव कांदळी,भटकळवाडी या गावांनी मोजणी प्रक्रियेलाच विरोध केला आहे. या प्रकल्पाला आम्हाला जमीनच द्यायची नसल्याची भूमिका शेतकऱ्यांनी लावून धरली आहे.