आमच्या व्यवसायाला अजूनही चालना मिळेना

पुणे : कोरोनाच्या वाढत्या प्रसाराने मागच्या वर्षी संचारबंदी जाहीर केली. त्यानंतर आमच्यासारख्या व्यावसायिकांचे पोटापाण्याचे प्रश्न निर्माण झाले. नवीन वर्षांपासून सर्व काही पूर्वपदावर आले आहे. परंतु, आमच्या व्यवसायाला अजूनही चालना मिळाली नाही. कोरोनाच्या वाढत्या प्रादुर्भावाने आम्हाला पुन्हा लॉकडाऊन होण्याची भीती वाटू लागली आहे ,असे मत व्यावसायिकांनी ‘लोकमत’कडे व्यक्त केले.

डिसेंबर-जानेवारी महिन्यापासून त्यांनी पुन्हा कामाला सुरुवात केली. आधीच्या तुलनेत आर्थिक परिस्थिती भरून काढण्यास वेळ लागणार होता. त्यासाठी अजूनही हे धडपड करत आहेत. आता एक वर्ष होऊनही व्यवसाय सुरळीत चालू झाला नाही. त्यामुळे आर्थिकदृष्ट्या सक्षमपणे उभे राहता येत नसल्याची नाराजी त्यांनी व्यक्त केली.

देशात संचारबंदी लागू झाल्यावर सरबत, उसाचे गुऱ्हाळ, चांभार, खाद्यपदार्थ गाडी चालवणारे, स्टॉलवरील चहाविक्रेते, चणे-फुटाणे विक्रेते, अशा हातावर पोट असणाऱ्या लोकांना सर्वात जास्त बसला आहे.

महाराष्ट्रातील इतर जिल्ह्याबरोबरच पराराज्यातून पुण्यात व्यवसाय करण्यासाठी ही लोकं येत असतात. लहान व्यवसायातून त्यांच्या पूर्ण कुटुंबाच्या उदरनिर्वाह सुरू असतो. परंतु, अशा अचानक ओढवलेल्या संकटाने पोटापाण्याचे प्रश्न निर्माण होतात. तसेच त्यांच्या डोक्यावरील कर्जही वाढत जाते. कोरोनाचे सावट अजून असल्याने त्यांच्या मनातील भीती वाढत चालली आहे.

फळ आणि भाजी विक्रेत्या सुरेखा शिंदे म्हणाल्या, मागच्या वर्षी कोरोनामुळे आम्हाला गावी जावे लागले होते. गावी जाऊन राशन भरण्यासाठी आम्हाला कर्ज काढावे लागले. जवळपास सात महिने आर्थिक चणचण भासत होती. त्यामध्ये मला मधुमेहाचा त्रास सुरू झाला. दवाखान्याच्या खर्चही वाढत गेला. आता व्यवसाय सुरू झाला आहे. तरीही महिन्याभराच्या कमाईत ६० टक्के घट झाली आहे. पुन्हा लॉकडाऊन होऊ नये असेच आमचे म्हणणे आहे.

--

उन्हाळ्यात उसाच्या रसाला मोठ्या प्रमाणात मागणी असते. पण मागच्या वर्षी याच हंगामात कोरोनाचा प्रादुर्भाव वाढू लागला होता. त्यामुळे व्यवसाय पूर्णपणे बंद पडला. त्यानंतर पावसाळ्याच्या शेवटी सुरुवात झाली. पण आर्थिक भार कमी झालाच नाही. वर्षभरात ३ ते ४ लाख रुपयांचा व्यवसाय होतो. पण मागच्या वर्षी तर कर्जाचा डोंगरच उभा राहिला. डिसेंबरपासून व्यवसाय पूर्वपदावर येत असताना पुन्हा कोरोना वाढू लागला आहे. त्यामुळे व्यवसाय थंडावला आहे.

- पांडुरंग फडतरे, उसाचा रस विक्रेते

--

कोरोनाच्या पार्श्वभूमीवर संचारबंदी लागू केली. त्याचा फटका फक्त गरिबांना बसला आहे. तीन महिने अचानक सर्व बंद झाल्याने आर्थिक संकट उभे राहिले होते. काही महिन्यांनी सर्व काही सुरू होण्यास सुरुवात झाली. पण व्यवसायात मोठ्या प्रमाणावर घट झाली आहे. खाण्याचा प्रश्न सुटून चालत नाही. घरभाडे, लाईट बिल इतर गोष्टीही याच्यावरच अवलंबून असतात. सरकार लॉकडाऊनची भीती दाखवत आहे. असे काही झाले तर जगणे कठीण होईल.

- राजू वरछाये, चांभार

---

संचारबंदीपासून आठ महिने व्यवसाय बंद होता. लाईट बिल, घरभाडे सर्व काही थकीत होते. अनेक अडचणींना सामोरे जावे लागले. पूर्वी महिन्याला ८ ते १० हजार रुपये सुटत होते. पण आता ५ हजारही मिळणे अवघड झाले आहे. शाळा, कॉलेज बंद असल्याने हे घडत आहे. नगरसेवक, राजकीय नेते गरिबांना मदत करतानाचे फोटो टाकतात. पण आमच्यापर्यंत काही पोहोचत नाही. सरकारने लॉकडाऊनचा विचारही करू नये.

- ज्ञानेश्वर सुपेकर, लिंबू सरबत विक्रेते