एकतर्फी प्रेमातून तरुणीच्या वडिलांवर कोयत्याने वार

लोकमत न्यूज नेटवर्क

पुणे : एकतर्फी प्रेमातून एका तरुणाने त्याच्या तीन साथीदारांसह तरुणीच्या वडिलांवर कोयत्याने वार केले. तसेच तरुणीसह तिच्या बहिणीला देखील मारहाण केली. ही घटना हडपसर येथील काळेपडळ येथे रविवारी रात्री अकराच्या सुमारास घडली.

याप्रकरणी काळेपडळ येथे राहणार्या ४० वर्षाच्या व्यक्तीने वानवडी पोलिस ठाण्यात फिर्याद दिली आहे. त्यानुसार पोलिसांनी खुनाचा प्रयत्न केल्याचा गुन्हा दाखल करुन सौरभ अडागळे, सागर अडागळे, रोहित भोसले या तिघांसह एका अल्पवयीनला पोलिसांनी अटक केली आहे.

सौरभ अडागळे याने फिर्यादींच्या मुलीकडे प्रेमाची मागणी केली होती. मात्र तिने सौरभला नकार दिला होता. त्यामुळे सौरभ हा चिडून होता. त्यातूनच त्याने फिर्यादींच्या घरासमोर येऊन आरडा-ओरडा करत राडा घातला होता. त्यावेळी फिर्यादींनी त्याला जाब विचारला असता, त्याने त्यांना जीवे ठार करण्याची धमकी दिली होती. दरम्यान फिर्यादी हे याबाबत तक्रार देण्यासाठी पोलिस चौकीकडे निघाले असता, सौरभ व त्याच्या तीन साथीदारांनी माझ्या भावाला का मारलेस तुला जीवंत सोडणार नाही असे म्हणत कोयत्याने त्यांच्या डोक्यात व खाद्यावर वार केले. तसेच लाथाबुक्यांनी व दगडानी मारहाण करून त्यांच्या दोन्ही मुलींना देखील मारहाण केली. एवढेच नाही तर परिसरात दहशत निर्माण करत हातातील कोयते हवेत फिरवून व दगड हातात घेऊन आमच्या नादी कोण लागले तर एकाएकाला जीवंत सोडणार नाही असे म्हणत गोंधळ घातला.