खानापूरमधील बंगल्यात पार्टी

लोकमत न्यूज नेटवर्क

पुणे : कठोर निर्बंध लागू असताना सिंहगड परिसरातील खानापूर गावात एका बंगल्यात सुरू असलेल्या पार्टीवर पोलिसांनी छापा टाकला. बंगल्यात नाचगाणी सुरू असल्याची माहिती मिळाल्यानंतर पोलिसांनी कारवाई केली.

याप्रकरणी वैभव राजू खिरीड (रा. गोऱ्हे बुद्रुक, ता. हवेली), अनिल गुलाब मते, सागर भरत मते, स्वप्निल राजाराम मते (तिघे रा. खडकवासला, ता. हवेली), रोहन बाळासाहेब गबदुले (रा. किरकिटवाडी, ता. हवेली), अनिकेत अशोक भोसले (रा. गौरव रेसिडन्सी, मानाजीनगर, नऱ्हे, सिंहगड रस्ता), दत्तात्रय बाजीराव जाधव (रा. खानापूर, ता. हवेली) यांच्यासह चार महिलांविरोधात गुन्हा दाखल करण्यात आला आहे. खानापूर परिसरातील एका बंगल्यात पहाटे नाचगाणे सुरू होते. ध्वनिवर्धकावरील गीतांचा आवाजामुळे नागरिकांना त्रास होत होता. याबाबतची माहिती पहाटे साडेचारच्या सुमारास ग्रामीण पोलिसांच्या नियंत्रण कक्षाला मिळाली.

त्यानंतर हवेली पोलीस ठाण्याचे वरिष्ठ निरीक्षक सदाशिव शेलार यांच्या मार्गदर्शनाखाली सहाय्यक फौजदार प्रदीप नांदे, दिलीप शिंदे, गृहरक्षक दलातील जवान निवंगुणे, धुमाळ आदींनी तेथे छापा टाकला. पोलीस असल्याची चाहूल लागताच बंगल्यात असलेले खिरीड, मते, भोसले, जाधव, गबदुले पसार झाले. पोलिसांनी चार महिलांना ताब्यात घेतले आणि चौकशी केली. चौकशीत महिलांनी आरोपींनी आम्हाला पार्टीत गाणी म्हणण्यासाठी बंगल्यात बोलावले होते, अशी माहिती पोलिसांना दिली. आदेश धुडकावणे, राष्ट्रीय आपत्ती व्यवस्थापन, महाराष्ट्र पोलीस अधिनियम कायद्यान्वये अकरा जणांविरोधात गुन्हा दाखल करण्यात आला आहे.

---