प्रवाशाला कोयत्याचा धाक दाखवून लुबाडले

पुणे : मुळगावी जाण्यासाठी गाडी शोधत असताना सराईत गुन्हेगारांनी कोयत्याचा धाक दाखवून हाताने मारहाण करुन प्रवाशाला लुबाडले. सुरक्षा रक्षक व गाडीचालकांना शस्त्राचा धाक दाखवून मारण्याची धमकी देणाऱ्या दोघांना मार्केटयार्ड पोलिसांनी अटक केली आहे.

योगेश गुजले आणि बबलु थोरात (रा. आंबेडकरनगर, मार्केटयार्ड) अशी अटक केलेल्यांची नावे आहेत. चांगा ऊर्फ शाहरुख याच्याविरुद्ध गुन्हा दाखल केला आहे. याप्रकरणी अभिजित खंडागळे (वय २५, रा. आंबेगाव पठार) यांनी फिर्याद दिली आहे.

खंडागळे हे मार्केटयार्ड येथील गेट नं. ४ येथे गावी जाण्यासाठी सोमवारी सकाळी गाडी शोधत होते. यावेळी योगे, बबलु व चांगा हे हातात कोयता, चॉपर व राॅड घेऊन तेथे आले. त्यांनी खंडागळे यांना शस्त्राचा धाक दाखवून हाताने मारहाण केली. त्यांच्याकडील मोबाईल जबरदस्तीने चोरला. गेटवरील सुरक्षा रक्षक व इतर गाडीचालकांना शस्त्राचा धाक दाखवून मारण्याची धमकी देऊन लुबाडण्याचा प्रयत्न करत होते. ही माहिती समजल्यावर पोलिसांनी घटनास्थळी धाव घेऊन दोघांना अटक केली. योगेश आणि चांगा हे दोघे पोलिसांच्या रेकॉर्डवरील गुन्हेगार आहेत.

............

हातातील सोन्याची पाटली लांबविली

पुणे : सासवड ते स्वारगेट या मार्गावर पीएमपी बसने प्रवास करून स्वारगेट बस स्थानक परिसरात उतरत असताना चोरट्याने महिलेच्या हातातील ५० हजार रुपयांची सोन्याची पाटली लंपास केली. याप्रकरणी एका ६५ वर्षाच्या महिलेने स्वारगेट पोलिसांकडे फिर्याद दिली आहे.