येरवड्यात भरधाव वाहनाच्या धडकेत पादचारी तरुण ठार

पुणे : भरधाव वाहनाने दिलेल्या धडकेत जखमी झालेल्या पादचारी तरुणाचा उपचारादरम्यान मृत्यू झाला. हा अपघात येरवड्यातील सिद्धार्थनगरसमोरील रस्त्यावर १२ सप्टेंबरला रात्री साडेअकराच्या सुमारास घडला. सुभाष सुरेश जाधव (वय ३१, रा. आनंदवाडी, लातूर) असे ठार झालेल्याचे नाव आहे. या प्रकरणी पोलीस अंमलदार कपिल भाकरे यांनी येरवडा पोलीस ठाण्यात तक्रार दिली आहे.

सुभाष मूळचा लातूरमधील. कामानिमित्त तो येरवड्यात राहत होता. १२ सप्टेंबरला रात्री साडेअकराच्या सुमारास सुभाष सिद्धार्थनगरसमोरील रस्त्यावरून जात असताना, अज्ञात वाहनचालकाने त्याला धडक दिली. त्यामुळे गंभीर जखमी झालेल्या सुभाषचा उपचारांदरम्यान मृत्यू झाला.

...........

पादचारी तरुणीचा ६५ हजारांचा मोबाईल हिसकावला

पुणे : विमाननगर परिसरातील सार्वजनिक रस्त्यावरून मोबाईलवर बोलत चालत जात असलेल्या तरुणीचा ६५ हजार रुपयांचा मोबाईल चोरट्यांनी हिसकावला. या प्रकरणी एका २६ वर्षांच्या तरुणीने विमानतळ पोलीस ठाण्यात फिर्याद दिली आहे.

फिर्यादी ह्या त्यांच्या बहिणीबरोबर मोबाईलवर बोलत चालत जात होत्या. त्यावेळी दोन दुचाकींवर आलेल्या चौघांनी त्यांचा मोबाईल हिसकावून ते पळून गेले.