पेट्रोल पंप मॅनेजरला कोयत्याचा धाक दाखवून पावणे नऊ लाख लुटले

लोकमत न्यूज नेटवर्क

पुणे : पेट्रोल पंपावर जमा झालेली रक्कम बँकेत जमा करण्यासाठी जात असलेल्या मॅनेजरला दोघा चोरट्यांनी कोयत्याचा धाक दाखवून ८ लाख ७४ हजार रुपयांची रोकड जबरदस्तीने लुटून नेली. हा धक्कादायक प्रकार हडपसरमधील काळेपडळ येथील रेल्वे अंडरग्राऊंडकडे जाणाऱ्या रोडवर सोमवारी दुपारी एकच्या सुमारास घडला.

याप्रकरणी बाळासाहेब पंढरी अंभोरे (वय ३६, रा. हांडेवाडी रोड, हडपसर) यांनी वानवडी पोलिसांकडे फिर्याद दिली. आंभोरे हे सय्यदनगर येथील एचपी पेट्रोल पंपावर मॅनेजर म्हणून काम करतात. शनिवार व रविवारी जमा झालेली ८ लाख ७४ हजार २५० रुपयांची रक्कम घेऊन ते बँकेत भरण्यासाठी दुचाकीवरून सोमवारी दुपारच्या सुमारास जात होते. काळेपडळ येथील रेल्वे अंडरग्राऊंड रोडने पुढे गेल्यानंतर समोरून मोपेडवरून आलेल्या दोघांनी त्यांची दुचाकी अडवली. एकाने कोयता भिरकावून मारला. त्यानंतर कोयत्याचा धाक दाखवत आंभोरे यांच्याजवळील रोकड असलेली बॅग घेऊन ते पळून गेले. त्यानंतर त्यांनी पोलिसांकडे धाव घेत तक्रार दिली. या घटनेची माहिती मिळताच पोलीस उपायुक्त नम्रता पाटील, सहायक पोलीस आयुक्त लक्ष्मण बोराटे, वरिष्ठ पोलीस निरीक्षक दीपक लगड यांच्यासह पोलीस अधिकाऱ्यांनी घटनास्थळाला भेट देऊन माहिती घेतली. फिर्यादीने चोरट्यांचे वर्णन पोलिसांना दिले असून त्यांचा शोध सुरू आहे.