सिंहगड किल्ल्यावर होणार प्लास्टीकबंदी

लोकमत न्यूज नेटवर्क

पुणे : सिंहगड किल्ला परिसर विकास आराखड्यानुसार पर्यटनवाढीच्या दृष्टिकोनातून पुणे वनविभागाने किल्ल्यावर अनेक महत्त्वाचे बदल करण्याचा निर्णय घेतला आहे. येत्या काही दिवसांत किल्ल्यावर प्लास्टीकबंदी करण्याचा निर्णय घेतला जाणार आहे, तसेच किल्ल्यावर खासगी वाहनांना बंदी घालण्यात येणार असून, किल्ल्यावर जाण्यासाठी ई-वाहनांची व्यवस्था केली जाणार असल्याची माहिती उपवनसंरक्षण राहुल पाटील यांनी दिली.

सिंहगड किल्ले परिसराच्या विकासासंदर्भात विविध विषयांवर चर्चा करण्यासाठी पुणे विभागाचे उपवनसंरक्षक राहुल पाटील यांनी मंगळवारी स्थानिक नागरिक, संयुक्त वनव्यवस्थापन समितीची बैठक घेतली. यावेळी त्यांनी वरील माहिती दिली.

पाटील म्हणाले, सिंहगड किल्ल्यावर पर्यटनवाढीसाठी येत्या काळात आमूलाग्र बदल केले जाणार आहे. किल्ल्याचे पावित्र्य जपण्यासाठी पुरातत्त्व खाते आणि वनविभाग मिळून काम करणार आहे. सिंहगड पर्यटन विकास आरखड्यानुसार किल्ल्यावर यापुढे खासगी वाहनांना प्रवेशबंदी करण्यात येणार आहे. वाहनतळासाठी किल्ल्याच्या खाली काही एकरात सुसज्ज वाहनतळ उभारण्यात येणार आहे. येथून किल्ल्यावर जाण्यासाठी ई-वाहनांची व्यवस्था केली जाणार आहे. सर्वात महत्त्वाचे म्हणजे गडाचे पावित्र्य जपण्यासाठी किल्ल्यावर पूर्णपणे प्लास्टीकबंदी केली जाणार आहे. प्लास्टीक नेताना कुणी आढळल्यास त्याच्यावर दंडात्मक कारवाई केली जाणार आहे.

स्थानिकांनी उभारलेले खाद्यपदार्थांचे स्टॉल संपूर्ण किल्ल्यावर आहेत. मात्र, हे स्टॉल झोपड्यांमध्ये उभारलेले आहे. हे चांगले दिसत नाही. या व्यावसायिकांसाठी किल्ल्यावर दोन ठिकाणी फूड मॉल उभारण्यात येणार आहे. या फूड मॉलध्ये किल्ल्यावरील सर्व व्यावसायिकांना एकत्र आणले जाणार आहे.

किल्ल्यावरील वाहनतळाच्या ठिकाणी पार्किंगची समस्या आहे. ही समस्या दूर करण्यसाठी १५ इलेक्ट्रिक बसेस भाड्याने घेण्यासाठी पीएमपीएमएलसोबत करार करण्यात येणार आहे. पाण्याची समस्या सोडविण्यासाठी किल्ल्यावर वॉटर फिल्टर प्लांट उभारण्यात येणार आहे. वर्षानुवर्षे हा किल्ला लोकांचे आवडते ठिकाण बनले आहे. सर्व क्षेत्रातील लोक मोठ्या संख्येने किल्ल्याला दररोज भेट देतात. कोरोनामुळे सध्या पर्यटन बंद असले, तरी येत्या काळात लवकरच पर्यटन सुरू होण्याची अपेक्षा आहे.

चौकट

स्थानिक उलगडणार किल्ल्याचा इतिहास

किल्ले सिंहगडाला मोठा इतिहास आहे. किल्ल्याची माहिती देणारे मोजकीच मंडळी आहेत. यामुळे किल्ल्यावरील जवळपास ३० स्थानिकांना गाइडचे प्रशिक्षण वनविभाग आणि पुरातत्त्व विभाग देणार आहे. यासाठी काही इतिहास तज्ज्ञांची बोलणी सुरू आहे. त्यांच्या माध्यमातून किल्ल्यांचा संपूर्ण माहिती त्यांना दिली जाणार आहे. हे ३० जण गडावर मार्गदर्शक म्हणून काम करतील. यामुळे त्यांना उत्पन्न मिळेल आणि येथे येणाऱ्या पर्यटकांना गडाविषयी अचूक माहिती मिळेल.

- राहुल पाटील, उपवनसंरक्षक