बलात्कारप्रकरणी पोलीस अटकेत; १२ जुलैपर्यंत पोलीस कोठडी

पुणे : लग्नाचे आमिष दाखवून आणि दहा महिने लग्न झाले आहे, असे भासवून तरुणीवर बलात्कार करणाऱ्या पोलिसाला लोणीकंद पोलिसांनी अटक केली. त्याला १२ जुलैपर्यंत पोलीस कोठडीत ठेवण्याचा आदेश प्रथमवर्ग न्यायदंडाधिकारी एस.जे. डोलारे यांनी दिला.

संदीप बळीराम वाघमारे (वय २९, रा. वरळी पोलीस मुख्यालय, मूळ रावण कोळा, ता. जळकोट, जि. लातूर) असे पोलीस कोठडी झालेल्या पोलिसाचे नाव आहे. याबाबत २७ वर्षीय तरुणीने पोलिसांत फिर्याद दिली आहे. ४ जानेवारी २० मे २०२१ या कालावधीत ही घटना घडली. ४ जानेवारी ते १७ जुलै २०२० या कालावधीत त्याने तरुणीला लग्नाचे आमिष दाखविले आणि त्यानंतर २० मे २०२१ पर्यंत लग्न झाले आहे, असे भासवून त्याने शारीरिक संबंध प्रस्थापित केले. त्यानंतर तिच्या आईवडिलांकडून अडीच लाख रुपये रोख आणि अडीच तोळे सोने घेऊन फसवणूक केल्याचे फिर्यादीत म्हटले आहे. या प्रकरणात पोलिसांनी वाघमारे याला न्यायालयात हजर केले. त्यावेळी वैद्यकीय तपासणी करण्यासाठी, तसेच वाघोली, कांजुरमार्ग, लातूर, पनवेल या ठिकाणी तिच्याशी शारीरिक संबंध प्रस्थापित केले आहेत. तेथे जाऊन तपास करण्यासाठी त्याला पोलीस कोठडी देण्याची मागणी सहायक सरकारी वकील ज्ञानेश्वर मोरे यांनी केली.

--------------------------------------------------------------------------