भाजप आमदार राम सातपुते यांच्या शाही लग्न सोहळ्याची होणार पोलीस चौकशी 

शेकडो पोलिसांचा बंदोबस्त : तरीही कोरोना नियमांपासून अनभिज्ञ

पुणे : कोरोनाचा प्रादुर्भाव वाढू नये, म्हणून एका बाजूला राज्यात २२ डिसेंबरपासून रात्रीची संचारबंदी लावली जात असतानाच माळशिरसचे भाजप आमदार राम सातपुते त्यांचा अतिशय शाही थाटात झालेल्या विवाह समारंभात विरोधी पक्षनेत्यांसह हजोरा नेते कार्यकर्ते उपस्थित होते. त्यावरुन सोशल मिडियावर आज दिवसभर सामान्यांना ५० लोकांची मर्यादा असताना राजकीय लोकांना कोणतेही बंधन नाही का अशी टीका होत होती. दरम्यान, याप्रकरणी सुरुवातीला शहर पोलीस दलानेही कानावर हात ठेवले होते. मात्र आता या शाही लग्न सोहळ्याची चौकशी करण्याचे आदेश दिले आहे.

आमदार राम सातपुते यांचा विवाह शुभारंभ लॉन्समध्ये साजरा झाला. या लग्नाला पाहुण्यांची अलोट गर्दी झाली होती. विधानसभेचे विरोधीपक्ष नेते देवेंद्र फडणवीस, विधानपरिषदेचे विरोधीपक्ष नेते प्रवीण दरेकर, आमदार गोपीचंद पडळकर यांच्यासह भाजपच्या दिग्गज नेत्यांनी लग्नाला हजेरी लावली होती. सामान्यांसाठी लग्नाला केवळ ५० पाहुण्यांना बोलावण्याची मुभा असताना व नियम मोडल्यास तात्काळ गुन्हे दाखल होत असताना आमदारांना नियमावली नाही का असा सवाल आता विचारण्यात येत आहे.

राम सातपुते यांच्या लग्नाला हजारो पाहुण्यांना निमंत्रण देण्यात आले होते. लग्न सोहळ्यातील फोटोमध्ये अनेक पाहुणे आणि नेते मंडळींनी तोंडाला मास्क लावला नसल्याचे पाहायला मिळाले. मोठ्या संख्येने गर्दी असल्यामुळे सोशल डिस्टन्सिंगचाही बोजवारा उडाला. लग्नाला उपस्थित राहिलेले फडणवीस, दरेकर यांच्यापासून अनेक नेत्यांना पोलीस बंदोबस्त असतो. त्यामुळे मोठ्या प्रमाणावर येथे पोलीस बंदोबस्त होता, असे असूनही कोरोनाचा नियम मोडला जात आहे, याचे या राजकीय नेत्यांसह पोलीस अधिकाऱ्यांनी याकडे दुर्लक्ष केल्याचा ठपका ठेवण्यात आला होता. मात्र आता याप्रकरणी पोलीस चौकशी करण्यात येणार आहे. .

अहवाल मिळाल्यानंतर पुढील कारवाई करण्यात येणार

राम सातपुते यांच्या लग्न सोहळ्यातील कोरोना नियमावलीचे उल्लंघन झाले असल्याची माहिती समोर येत आहे. त्या सोहळ्यात संदर्भात अलंकार पोलीस ठाण्याचे वरिष्ठ पोलीस निरीक्षक संजीवन जगदाळे यांना चौकशी करण्यास सांगण्यात आले आहे. त्यांच्याकडून याबाबतचा अहवाल मिळाल्यानंतर पुढील कारवाई करण्यात येणार आहे.
डॉ. रवींद्र शिसवे म्हणाले, सहपोलीस आयुक्त
........
हे नेते होते उपस्थित
देवेंद्र फडणवीस, प्रवीण दरेकर, चंद्रकांत पाटील, गोपीचंद पडळकर, प्रसाद लाड, हर्षवर्धन पाटील, गिरीश बापट, सुभाष देशमुख, निलेश राणे यासारखे भाजपचे दिग्गज नेते लग्नाला उपस्थित होते. राष्ट्रवादीचे नेते आणि सोलापूरचे पालकमंत्री दत्ता भरणे यांनीही राम सातपुते यांच्या लग्नाही हजेरी लावली.
......