पूजा खेडकरच्या आईने बंगल्यासमोरील फुटपाथवर केले अवैध बांधकाम

३ फूट रुंद आणि साठ फूट लांब जागा बळकावली : सात दिवसांत अनधिकृत बांधकाम हटवा, अन्यथा कारवाईचा महापालिकेचा इशारा

पुणे : वादग्रस्त प्रशिक्षणार्थी आयएएस अधिकारी पूजा खेडकर व त्यांच्या कुटुंबीयांचे नवनवे कारनामे रोज उघडकीस येऊ लागले आहेत. पूजा यांच्या आई मनोरमा यांनी बाणेर येथील रो-हाऊसच्या सीमा भिंतीला लागून फुटपाथवर तीन फूट रुंद, दोन फूट उंच आणि साठ फूट लांबीचे अवैध बांधकाम केल्याचे समोर आले आहे. हे अनधिकृत बांधकाम येत्या सात दिवसांत काढून घ्या, अन्यथा कारवाई केली जाईल, अशी नोटीस महापालिकेने त्यांच्या  घरावर चिकटवली आहे.  

नॅशनल हाैसिंग सोसायटीमधील प्लॉट क्रमांक ११२ मध्ये पूजा यांच्या आई मनोरमा खेडकर रो-हाऊसमध्ये राहतात. त्यांनी रो-हाऊसच्या सीमा भिंतीला लागून फुटपाथवर तीन फूट रुंद, दोन फूट उंची आणि साठ फूट लांबीचे बांधकाम केले आहे. हे बांधकाम अनधिकृत असून ते येत्या सात दिवसांच्या आतमध्ये स्वखर्चाने काढून घेण्यात यावे, अन्यथा पुणे महापालिकेच्या अतिक्रमण विभागामार्फत काढून टाकले जाईल, अशा आशयाची नोटीस पालिकेच्या अधिकाऱ्यांनी भिंतीवर चिकटवली आहे. 

ओबीसी कोट्यातून केले एमबीबीएस

पूजा खेडकर यांनी पुण्यातील काशिबाई नवले मेडिकल कॉलेजमधून एमबीबीएसची पदवी घेतली आहे. त्यासाठी सन २००७ मध्ये त्यांनी ओबीसीतील भटक्या जमाती-३ (एनटीसी-३) या कोट्यातून प्रवेश घेतला होता.

विशेष म्हणजे, वडील आयएएस अधिकारी असताना त्यांनी नाॅन क्रिमिलेअर सर्टिफिकेट जोडले होते. त्यावेळी नाॅन क्रिमिलेअर सर्टिफिकेट हे ज्यांचे वार्षिक उत्पन्न साडेचार लाखांच्या आत हाेते त्यांनाच मिळत हाेते.

खेडकर यांनी आयएएस हाेण्यासाठी यूपीएससीकडे अपंगत्वाचे प्रमाणपत्र दिले आहे. त्या काेट्यातून त्यांना नाेकरीही मिळाली; परंतु वैद्यकीय प्रवेश घेताना अपंगत्व प्रमाणपत्र दिलेले नाही. मग यूपीएससीच्या वेळीच त्यांना अपंगत्व आले होते का ? असाही प्रश्न उपस्थित केला जात आहे.

पूजा खेडकर यांनी सन २००७ मध्ये आमच्या वैद्यकीय महाविद्यालयात एमबीबीएसला प्रवेश घेतला हाेता. त्यावेळी सीईटीद्वारे प्रवेश देण्यात आला हाेता. त्यावेळी त्यांना एनटीसी-३ या प्रवर्गातून प्रवेश दिला आहे, तसेच त्यावेळचे नाॅन क्रिमिलेअर सर्टिफिकेट हे नगरचे एसडीओ यांचे आहे.  

- डाॅ. अरविंद भाेरे,

वैद्यकीय संचालक, काशिबाई नवले वैद्यकीय महाविद्यालय, नऱ्हे