वीजवाहिनी तुटल्याने निम्म्या शहराची वीज गायब, पुढील दोन दिवस पेठांमध्ये येणार भारनियमनाची वेळ

नाल्यामध्ये साफसफाई करीत असताना जेसीबीमुळे महापारेषणची १३२ केव्हीची भूमिगत वीजवाहिनी तुटल्याची घटना बुधवारी दत्तवाडीतील फरशी पुलाजवळ घडली.

पुणे : नाल्यामध्ये साफसफाई करीत असताना जेसीबीमुळे महापारेषणची १३२ केव्हीची भूमिगत वीजवाहिनी तुटल्याची घटना बुधवारी दत्तवाडीतील फरशी पुलाजवळ घडली. त्यामुळे जीआयएस, तसेच ‘महावितरण’च्या सहा उपकेंद्रांचा वीजपुरवठा गुरुवारी दुपारी अडीचच्या सुमारास खंडित झाला होता. त्यामुळे शहरातील शनिवार, नारायण, सदाशिव, कसबा, बुधवार, रविवार, शुक्रवार, मंगळवार, सोमवार, भवानी आणि नवी पेठेसह लुल्लानगर, कोंढवा, मुकुंदनगर, गुलटेकडी, लक्ष्मी रोड, सिंहगड रोड, कॅम्प, मार्केट यार्ड, स्वारगेट या भागातील वीजपुरवठा बंद पडला. या ढिसाळ कारभाराचा फटका तब्बल अडीच लाख नागरिकांना बसला आहे. या भागांमध्ये पुढील दोन दिवस चक्राकार पद्धतीने ३ ते ४ तासांचे भारनियमन करण्यात येणार आहे.
‘महापारेषण’च्या पर्वती २२० उपकेंद्रामधून भूमिगत वीजवाहिनीद्वारे रास्ता पेठ १३२ केव्ही जीआयएस उपकेंद्राला वीजपुरवठा केला जातो. या उपकेंद्रातील वाहिन्यांद्वारे ‘महावितरण’च्या सेंटमेरी, कसबा पेठ, मंडई, लुल्लानगर, गुलटेकडी व रास्ता पेठ या सहा उपकेंद्रांना वीजपुरवठा करण्यात येतो. फरशी पुलाजवळील नाल्यामध्ये जेसीबीच्या साहाय्याने कचरा साफ करण्याचे काम सुरू होते. त्यासाठी सिमेंटचे काँक्रीट उखडण्यात आले. त्यामुळे भूमिगत वाहिन्यांचे नुकसान झाले. रात्रभर सुरू असलेल्या पावसामुळे वाहिनीमध्ये आर्द्रता वाढल्याने गुरुवारी दुपारी या वाहिनीचा स्फोट झाला. त्यानंतर रास्ता पेठ केंद्राचा वीजपुरवठा बंद पडला.
या केंद्रावर अवलंबून असलेल्या अन्य सहा केंद्रांवर त्याचा परिणाम झाला. त्यामुळे ७० ते ८० मेगावॉट विजेचे भारव्यवस्थापन करून या भागातील ग्राहकांना वीज पुरविण्याचे प्रयत्न ‘महावितरण’ने सुरू केले. अन्य उपकेंद्रांमधून पर्यायी व्यवस्था करण्यासाठीही प्रयत्न सुरू करण्यात आले आहेत.
दरम्यान, काही भागात नाइलाजास्तव चक्राकार पद्धतीचे भारनियमन सुरू करण्यात आल्याचे ‘महावितरण’ने कळविले आहे. या वाहिनीच्या दुरुस्तीसाठी, तसेच बंद पडलेल्या उपकेंद्रांचा वीजपुरवठा सुरू होण्यास दोन दिवस लागणार आहेत. ग्राहकांनी विजेचा वापर आवश्यकतेनुसार करावा, तसेच उद्योग किंवा व्यावसायिकांनी विजेऐवजी शक्य असल्यास जनरेटरचा वापर करावा, असे आवाहन ‘महावितरण’ने केले आहे.
।या भागाला बसला फटका
शहराच्या मध्यवस्तीमधील रास्ता पेठ, कसबा पेठ, भवानी पेठ, बुधवार पेठ, नवी पेठ, सदाशिव पेठ, गंज पेठ, सोमवार पेठ, मंगळवार पेठ, गुरुवार पेठ, शुक्रवार पेठ, शनिवार पेठ, नारायण पेठ, लुल्लानगर, कोंढवा, कॅम्प, गुलटेकडी, मंडई, मुकुंदनगर, लक्ष्मी रोड, सिंहगड रोड, रहेजा गार्डन, सॅलिसबरी पार्क, गुलटेकडी, महर्षी नगर, मुकुंदनगर, मार्केट यार्ड, शंकरशेठ रोड, स्वारगेट, जिल्हाधिकारी कार्यालयाचा काही परिसर, पर्वती आदी परिसराला
वीजवाहिनी तुटल्याचा फटका बसला.
खोदकामात नादुरुस्त झालेली ‘महापारेषण’ची वीजवाहिनी विशिष्ट प्रकारची आहे. वाहिनीच्या दुरुस्तीसाठी आवश्यक असणारा जाइंट चेन्नई येथून विमानाने मागविण्यात आला आहे. शुक्रवारी या वाहिनीच्या दुरुस्तीचे काम ‘महापारेषण’कडून सुरू होणार असल्याचे सांगण्यात आले.