पूजा चव्हाण आत्महत्याप्रकरणी राष्ट्रीय महिला आयोगाला प्राथमिक अहवाल सादर

पुणे : पूजा चव्हाण आत्महत्याप्रकरणी आतापर्यंत झालेल्या तपासाबाबत प्राथमिक अहवाल राष्ट्रीय महिला आयोग तसेच पोलीस महासंचालकांना सादर करण्यात आला असल्याची माहिती सहपोलीस आयुक्त डॉ. रवींद्र शिसवे यांनी दिली.

पूजा चव्हाण हिच्या आत्महत्येप्रकरणाची राष्ट्रीय महिला आयोगाने गंभीर दखल घेऊन पुणे पोलिसांना त्याबाबतचा सविस्तर अहवाल मागविला होता. गेल्या शुक्रवारी आयोगाने हा आदेश दिला होता. त्याची दखल घेऊन पुणे पोलिसांनी आतापर्यंत या प्रकरणात झालेल्या तपासाची माहिती राष्ट्रीय महिला आयोगाला पोलीस उपायुक्त नम्रता पाटील यांनी दिली आहे. तसेच त्याबाबतची माहिती पोलीस महासंचालकांना दिली असल्याचे डॉ. रवींद्र शिसवे यांनी सांगितले.

पूजा चव्हाण आत्महत्याप्रकरणी पुणे पोलिसांची पथके यवतमाळ तसेच पूजा चव्हाण हिच्या मूळगावी गेले असून तेथे तपास करीत आहेत. पूजा चव्हाण हिच्या नातेवाईकांचे जबाब घेण्यात येत आहे.