ट्रस्टचे अध्यक्ष सचिव असल्याचे भासवून पावणेआठ कोटी लाटले, वक्फ मंडळाची केली फसवणूक

पुणे : औरंगाबाद येथील वक्फ मंडळाचे बनावट ना हरकत प्रमाणपत्र सादर करून ट्रस्टचे अध्यक्ष व सचिव असल्याचे भासवून शासनाकडून नुकसानभरपाईची पावणेआठ कोटींची रक्कम परस्पर लाटल्याचा प्रकार समोर आला आहे. याप्रकरणी वक्फ बोर्डाच्या अधिकाऱ्याने दिलेल्या फिर्यादीवरून बंडगार्डन पोलिसांनी दोघांविरुद्ध गुन्हा दाखल केला आहे.

प्रादेशिक वक्फ अधिकारी खुस्त्रो खान सर्फराज खान (वय ४९, रा. कोंढवा) यांनी बंडगार्डन पोलिसांकडे फिर्याद दिली आहे. त्यावरून पोलिसांनी इम्तियाज महंमद हुसेन शेख आणि चाँद रमजान मुलाणी (दोघे रा. रामनगर, येरवडा) यांच्याविरुद्ध गुन्हा दाखल केला आहे. हा प्रकार जिल्हाधिकारी कार्यालयातील उपजिल्हाधिकारी भूसंपादन यांच्याकडे ८ डिसेंबर २०२० ते २ जानेवारी २०२१ दरम्यान घडला आहे.

याबाबत पोलिसांनी दिलेल्या माहितीनुसार: मुळशी तालुक्यातील माण येथे ताबूत इनाम इंडोमेंट ट्रस्ट या मुस्लिम ट्रस्टच्या मालकीची सुमारे ८ हेक्टर ५७ जागा आहे. या जमिनीपैकी ५ हेक्टर ५१ आर जमीन शासनाने राजीव गांधी तंत्रज्ञान टप्पा क्रमांक ४ साठी अधिग्रहण केली. त्याचा मोबदला ९ कोटी ६४ लाख ४२ हजार ५०० रुपये मंजूर केला होता. ही रक्कम ट्रस्टला मिळाली नसल्याने ट्रस्टींनी वक्फ बोर्डाला कळविले. त्यानंतर खान यांनी उपजिल्हाधिकारी यांच्याकडे चौकशी केल्यावर हा सर्व प्रकार समोर आला. इम्तियाज शेख यांनी ताबूत इनाम इंडोमेंट ट्रस्टकडे विश्वस्त नियुक्तीसाठी अर्ज दाखल केला होता. त्यांच्याशिवाय आणखी ३ अर्ज दुसऱ्या विश्वस्तांनी दाखल केले होते. त्यावर अद्याप निर्णय झाला नाही. तरीही इम्तियाज शेख व चाँद मुलाणी यांनी आपण ट्रस्टचे अध्यक्ष व सचिव असल्याचे दाखवून तसेच औरंगाबाद येथील राज्य वक्फ मंडळाचे उपमुख्य कार्यकारी अधिकाऱ्यांचे बनावट ना हरकत पत्र उपजिल्हाधिकाऱ्यांना सादर केले. सरकारी अधिकाऱ्यांची दिशाभूल करून त्यांच्याकडून ७ कोटी ७६ लाख ९८ हजार २५० रुपयांचा डिमांड ड्राफ्ट मिळविला. तो ट्रस्टच्या खात्यावर जमा न करता स्वत:चे बँक खात्यात जमा करून शासनाची व वक्फ मंडळाची फसवणूक केल्याचे फिर्यादीत म्हटले आहे.