कांदा, बटाटा, शेवगा व लसणाचे दर उतरले

पुणे : उन्हाळा कडक होत असला, तरी अद्यापही बाजारात भाजीपाल्याची आवक स्थिर आहे. परंतु कांदा, बटाटा, लसूण आणि शेवग्याची आवक वाढल्याने व मागणी स्थिर असल्याने दरामध्ये घसरण झाली. तर आवक कमी झाल्याने मटारचे दर वाढले. अन्य सर्व फळभाज्यांचे दर स्थिर असल्याची माहिती आडते असोसिएशनचे अध्यक्ष विलास भुजबळ यांनी दिली.

गुलटेकडी येथील श्री छत्रपती शिवाजी मार्केट यार्डातील तरकारी विभागात रविवार (दि.२१) रोजी ९० ट्रक शेतीमालाची आवक झाली. यात प्रामुख्याने परराज्यातून आलेल्या मालामध्ये राजस्थान येथून ५ ते ६ टेम्पो गाजर, गुजरात आणि कर्नाटकातून ४ ते ५ टेम्पो कोबी, आंध्र प्रदेश आणि तामिळनाडूतून ५ ते ६ टेम्पो शेवगा, गुजरात, कर्नाटक व आंध्र प्रदेशातून ८ ते १० टेम्पो हिरवी मिरची, तामिळनाडू आणि कर्नाटकातून तोतापुरी कैरी ५ ते ६ टेम्पो, हिमाचल प्रदेशातून मटार ३ ट्रक, मध्य प्रदेश आणि गुजरातमधून १४ ते १५ ट्रक लसूण, आग्रा, इंदौर आणि स्थानिक परिसरातून बटाट्याची ४५ ते ५० ट्रक इतकी आवक झाली आहे.

स्थानिक भागातून झालेल्या आवकेमध्ये सातारी आले १३०० ते १४०० गोणी, कोबी सुमारे ५ ते ६ टेम्पो, प्लॉवर ८ ते १० टेम्पो, भेंडी ६ ते ७ टेम्पो, गवार ४ ते ५ टेम्पो, सिमला मिरची ८ ते १० टेम्पो, टोमॅटो ७ ते ८ हजार पेटी, तांबडा भोपळा ४ ते ५ टेम्पो, हिरवी मिरची ३ ते ४ टेम्पो, पावटा ४ ते ५ टेम्पो, मटार २०० गोणी, भुईमूग शेंग ३० ते ४० गोणी, गावरान कैरी ४ ते ५ टेम्पो, कांदा ७० ते ८० ट्रक इतकी आवक झाली.

--------

भाजीपाला घाऊक दर किरकोळ दर

कांदा १०-१३ १५-२५

बटाटा ०८-१३ १५-३०

लसूण ३०-६० ४०-७०

शेवगा १०-२० २०-४०

टोमॅटो ०५-१० १५-२५

भेंडी २५-३० ३०-४०

गवार ४०-६० ५०-७०

मिरची ३०-५० ४५-६०

कोथिंबीर ०७-१० १०-१५

मेथी ०४-८० १०-१५

मटार ३५-४० ४०-५०

गाजर १०-१४ १५-२०

---

मेथी, चाकवत, अंबाडी, पालकचे दर वाढले

मार्केटयार्डात रविवारी मेथी, चाकवत, अंबाडी आणि पालकच्या दरात वाढ झाली असून, शेपू आणि चवळईच्या दरात मात्रघट झाली. तर कोथींबीर, कांदापात, करडई, पुदीना, मुळे, राजगिरा, चुका आणि हरभरागड्डीचे भाव स्थिर असल्याची माहिती व्यापाऱ्यांनी दिली.

रविवारी मार्केटयार्डात कोथींबीरीच्या दीड लाख ३० हजार जुड्यांची, मेथीची ५० हजार जुड्यांची आवक झाली़ मेथीच्या भावात घाऊक बाजारात गड्डीमागे तीन रुपये, अंबाडी दोन रुपये, चाकवत आणि पालक प्रत्येकी एक रुपयांनी वाढ झाली. तर शेपू आणि चवळईच्या भावात प्रत्येकी दोन रुपयांची घट झाली आहे.