Pune | जेजुरी-सासवड रोडवरील लॉजवर वेश्या व्यवसाय; दोन मुलींची सुटका

बेलसर येथे दोन मुलींची सुटका...

जेजुरी (पुणे) :जेजुरी-सासवड रोड वरील बेलसर गावचे हद्दीतील वेश्या व्यवसाय सुरू असणाऱ्या लक्ष्मी नारायण लॉजवर जेजुरी पोलिसांनी बनावट ग्राहक पाठवीत छापा टाकून कारवाई केली. यात वेश्या व्यवसायासाठी पश्चिम बंगाल मधून आणलेल्या दोन मुलींची सुटका करण्यात आली.

याबाबत जेजुरी पोलिसांकडून मिळालेली माहिती अशी की, जेजुरी पोलिस ठाण्याच्या कार्यक्षेत्रात जेजुरी सासवड मार्गालगत असणाऱ्या लक्ष्मी नारायण लॉजवर वेश्या व्यवसाय सुरू असल्याची माहिती जेजुरी पोलिसांना मिळाली होती. त्यानुसार जेजुरी पोलिसांनी सकाळी सव्वा दहा वाजण्याच्या सुमारास लॉजवर एक बनावट ग्राहक पाठवले. बनावट ग्राहकाने खात्री करून पोलिसांना इशारा केला असता पोलिसांनी छापा टाकला. यात वेश्या व्यवसायासाठी आणलेल्या पश्चिम बंगाल मधून आणलेल्या दोन मुली आढळून आल्या.

जेजुरी पोलिसांनी लॉज व्यवस्थापक रामा नारायण मोगाविरा ( वय ३८,रा. हॉटेल जय भवानी,सासवड रोड,वडकी,ता. हवेली) यास ताब्यात घेतले. वेश्या व्यवसायासाठी आणलेल्या मुलींची सुटका करण्यात आली आहे. जेजुरी पोलिसांनी आरोपी लॉज व्यवस्थापकास अटक करून त्याच्यावर स्त्रिया व मुली अनैतिक व्यापार प्रतिबंधक कायदा १९५६ चे कलम ३,४,(१),५,७ (अ) प्रमाणे गुन्हा दाखल केला आहे सदर कारवाई जेजुरी पोलिस ठाण्याचे पोलिस निरीक्षक उमेश तावसकर यांच्या मार्गदर्शनाखाली पोलिस उपनिरीक्षक नंदकुमार सोनवलकर,पोलिस हवालदार नंदकुमार पिंगळे, पोलिस हवालदार एन.आर.दोरके,पोलिस नाईक गणेश नांदे यांनी पार पाडली. पुढील तपास पोलिस उपनिरीक्षक नंदकुमार सोनवलकर करीत आहेत.