VIDEO : पोलीस हतबल अन् गुन्हेगार मोकाट; किरकोळ वादातून पुण्यात कोयत्याने वार

शहरात छोट्या मोठ्या कारणावरून कोयते काढले जातात आणि सर्रास वार केले जात आहेत...

पुणे/किरण शिंदे :पुणे शहरात राज्य कोणाचं? कायद्याचं की कोयत्याचं? असा प्रश्न पडावा अशीच परिस्थिती सध्या निर्माण झाली आहे. मागील काही दिवसांपासून पुणे शहरात कोयता गँगने अक्षरशः धुमाकूळ घातला असून पोलिसांच्या नाकीनऊ आणले आहेत. गल्लीबोळात छोटे-मोठे भाई हातात कोयते घेऊन सर्रास दहशत माजवताना दिसतायत. या कोयताधारी गँगची दहशत इतकी वाढली की हे आता पोलिसांनाही जुमानत नाहीत. छोट्या मोठ्या कारणावरून कोयते काढले जातात आणि सर्रास वार केले जात आहेत.

विमानतळ पोलिस स्टेशनच्या हद्दीत एका पोलीस कर्मचाऱ्यावरच चक्क चाकूने वार करण्यात आले होते. रात्री उशिरापर्यंत चायनीज सेंटर सुरू असल्याची माहिती नियंत्रण कक्षाला मिळाली होती. त्यानंतर विमानतळ पोलिस स्टेशनचे पोलीस नाईक सचिन जगदाळे हे त्या ठिकाणी गेले. या चायनीज सेंटरच्या मालकाला त्यांनी बंद करण्यास सांगितले आणि परत आले. पुन्हा थोड्या वेळाने हेच चायनीज सेंटर सुरू असल्याची माहिती त्यांना मिळाली. कारवाई करण्यासाठी सचिन जगदाळे त्या ठिकाणी गेले. यावेळी मात्र भलतंच घडलं. आक्रमक झालेल्या दुकान मालकाने सचिन जगदाळे यांच्यावर थेट चाकूने हल्ला केला. नशीब बलवत्तर म्हणून सचिन जगदाळे थोडक्यात बचावले. या घटनेनंतर पसार झालेल्या आरोपी महानंदेश्वर उर्फ मल्ल्या याला बंडगार्डन पोलिसांनी अटक केली. 

दुसरी घटना घडली पुण्यातील काँग्रेस भवनच्या शेजारी घडली. किरकोळ कारणावरून झालेल्या भांडणानंतर एका सराईत गुन्हेगाराने तलवारीने एका नागरिकावर प्राण घातक हल्ला केला होता. इतकेच नाही तर चार जणांनी हातात तलवार घेऊन आरडाओरडा करत दहशत निर्माण केली. एका व्यक्तीवर वार करत त्याला ठार मारण्याचाही प्रयत्न केला. शिवाजीनगर पोलीस ठाण्यात या प्रकरणी गुन्हा दाखल करण्यात आला असून एका सराईत गुन्हेगाराला अटक करण्यात आली आहे.

तिसरी घटना घडली पुण्यातील हडपसर परिसरात घडली. लग्नात नाचत असताना धक्का लागल्याचे निमित्त झाल्याने चार जणांनी एका तरुणावर कोयत्याने वार केले. बेदम मारहाण करत यात तरुणाला गंभीर जखमी केले. बाणेर परिसरातही वॉशिंग सेंटरवर काम करणाऱ्या एका मजूर तरुणावर कोयत्याने वार करण्यात आले. गंभीर जखमी झालेल्या या तरुणाला ससून रुग्णालयात दाखल करण्यात आले आहे.

पुण्यात सातत्याने होणाऱ्या या गुन्हेगारीची दखल उपमुख्यमंत्री देवेंद्र फडणवीस, पोलीस महासंचालक रजनीश शेठ यांनीही घेतली. कोणता गँगवर वचक बसविण्यासाठी स्पेशल स्कॉडची स्थापना करण्यात आल्याचेही रजनीश शेठ यांनी सांगितले. यालाही आता पाच दिवस उलटून गेले. मात्र शहरात सुरू असणारी ही गल्लीतल्या भाईंची दहशत मोडून काढण्यात पोलीस आयुक्त रितेश कुमार यांना अजून तरी यश आले नाही. त्यामुळे आता पुण्यात राज्य कोणाचं कायद्याचं की कोयत्याचं असा प्रश्न सर्वसामान्य नागरिकांकडून विचारला जातोय.