Pune | लोणावळ्यात IPL मॅचवर बेटिंग घेणाऱ्यांवर छापा; पाच जणांवर गुन्हा

पुणे ग्रामीणच्या स्थानिक गुन्हे शाखेने (एलसीबी) लोणावळ्यातील एका बंगल्यात ही कारवाई केली...

लोणावळा (पुणे) : आयपीएल मॅचवर सट्टा घेणाऱ्या पाचजणांवर लोणावळ्यात गुन्हा दाखल करण्यात आला. त्यांच्याकडून एक लॅपटाॅप, काही मोबाईल संच व टीव्ही असा साधारणत: एक लाख ५७ हजार रुपयांचा मुद्देमाल ताब्यात घेण्यात आला. पुणे ग्रामीणच्या स्थानिक गुन्हे शाखेने (एलसीबी) लोणावळ्यातील एका बंगल्यात ही कारवाई केली.

याप्रकरणी पुणे ग्रामीण एलसीबीचे सहायक पोलिस उपनिरीक्षक प्रकाश वाघमारे यांनी लोणावळा शहर पोलिस ठाण्यात फिर्याद दिली आहे. या फिर्यादीवरून राजवीनसिंग मनजितसिंग बांगा (वय २७, क्लब व्यवसाय, रा. वडाळा ट्रक टर्मिनल, मुंबई), मस्कीनसिंग रजेद्रसिंग अरोरा (३०, क्लब व्यवसाय, रा. पंजाबी काॅलनी, सायन कोळीवाडा), शषांक महाराणा (रा. प्रतीक्षानगर सायन ईस्ट), इफ्तेकार ऊर्फ इमरान खान (पूर्ण नाव व पत्ता माहीत नाही), षेन्टी (पूर्ण नाव माहीत नाही) रा. सायन ईस्ट कोळीवाडा यांच्यावर भादंवि कलम ४२०, ४६५ महाराष्ट्र जुगार कायदा कलम ४ (अ), भारतीय टेलिग्राफ ॲक्ट कलम २५ (क) प्रमाणे गुन्हा दाखल करण्यात आला आहे.

राजस्थान राॅयल विरुद्ध लखनौ जाएंट या सवाई मानसिंग स्टेडियम जयपूर येथे सुरू असलेल्या आयपीएल सामन्यावर काहीजण एका खासगी बंगल्यात बसून बेटिंग घेत असल्याची गुप्त माहिती पुणे ग्रामीणच्या एलसीबी पथकाला मिळाल्यानंतर या पथकाने तुंगार्ली भागातील या बंगल्याजवळ सापळा लावला. बुधवारी रात्री छापा मारला असता आत बंगल्यामध्ये वरील सर्वजण वेगवेगळ्या नावाने घेतलेल्या विविध मोबाईल सिमच्या माध्यमातून काही ॲप्लिकेशनचा वापर करत लॅपटाॅपवर बेटिंग घेत असताना मिळून आले. शासनाकडून बेटिंगवर बंदी असतानादेखील फसवणूक करत ही बेटिंग सुरू असल्याचे दिसून आल्याने हा गुन्हा दाखल करण्यात आला असून पुणे ग्रामीणचे पोलिस अधीक्षक, अपर अधीक्षक व एलसीबी पोलिस निरीक्षक यांच्या मार्गदर्शनाखाली एलसीबी पथकाचे सहायक पोलिस निरीक्षक चौधरी हे पुढील तपास करत आहेत.