महाविकास आघाडीकडून राणे-भाजपाचा निषेध

पुणे : मुख्यमंत्री उद्वव ठाकरे यांच्याबाबत अवमानकारक वक्तव्य करणारे नारायण राणे यांना आलेली सत्तेची मस्ती जनता उतरवेल, अशी टीका करत महाविकास आघाडीने मंडईत टिळक पुतळ्याजवळ आंदोलन केले.

राष्ट्रवादी काँग्रेसचे शहराध्यक्ष प्रशांत जगताप, काँग्रेसचे शहराध्यक्ष रमेश बागवे, शिवसेनेचे शहराध्यक्ष संजय मोरे यांच्या नेतृत्वाखाली टिळक पुतळ्याजवळ तिन्ही पक्षांच्या कार्यकर्त्यांनी राणे तसेच भाजपाच्या निषेधाच्या घोषणा दिल्या.

जगताप म्हणाले की, राणे यांची जीभ घसरली, त्यांना भाजपच बळ देत आहे. भाजपालाही याची किंमत चुकवावी लागेल. बागवे यांनी भाजपा ही चुकीची संस्कृती आणत असल्याचे सांगितले. मोरे यांनी राणे व त्यांच्या मुलांना जनतेने पराभवाचा धडा शिकवला, पण त्यांना तो समजला नसल्याचे सांगितले. राणे व भाजपाच्या नावाने वेगवेगळ्या घोषणा देत कार्यकर्त्यांनी परिसर दणाणून सोडला. तिन्ही पक्षांचे कार्यकर्ते, पदाधिकारी एकत्र आल्याने मंडईत गर्दी झाली होती.