पुण्यात कॉलेजच्या कॅन्टीनमध्ये तरुणीवर बलात्कार; मित्रांची व्हिडीओ व्हायरल करण्याची धमकी

तरुणीचा मित्र त्याची आई-बहीणसह पाच जणांविरुद्ध गुन्हा दाखल

पुणे : तरुणाने मैत्रिणीच्या इच्छेविरुद्ध जबरदस्तीने आश्रफनगर येथील एका कॉलेजच्या कॅन्टीनमध्ये शारीरिक संबंध प्रस्थापित केले. त्याचे एका दुसऱ्या मित्राच्या मार्फत चित्रीकरण केले. काही दिवसांनंतर ते चित्रीकरण इतर दोन मित्रांना पाठवले. त्या मित्रांनी व्हिडीओ व्हायरल करण्याची धमकी देऊन तरुणीकडे शारीरिक सुखाची मागणी केली. हा प्रकार घडल्यानंतर संबंधित तरुणी तिच्या मित्राच्या आईला सांगण्यासाठी घरी गेली. मात्र, तिला शिवीगाळ करून मारहाण करण्यात आली. ही धक्कादायक घटना कोंढव्यातील आश्रफनगर परिसरात घडली आहे.

याप्रकरणी कोंढवा पोलिसांनी तरुणीचा मित्र त्याची आई-बहीण व मित्राचे इतर दोन मित्र अशा पाच जणांविरुद्ध गुन्हा दाखल केला आहे. याबाबत २० वर्षांच्या तरुणीने फिर्याद दिली आहे. ही घटना ऑगस्ट २०२१ ते गुन्हा दाखल होईपर्यंतच्या कालावधीत घडली आहे.

पोलिसांनी दिलेल्या माहितीनुसार, फिर्यादी पीडित तरुणी व आरोपी हे दोघे एकमेकांचे मित्र आहेत. त्याने तरुणीच्या इच्छेविरुद्ध जबरदस्तीने आश्रफनगर येथील एका कॉलेजच्या कॅन्टीनमध्ये शारीरिक संबंध प्रस्थापित केले. त्याचे एका दुसऱ्या मित्राच्या मार्फत चित्रीकरण केले. हा प्रकार घडल्यानंतर पीडित तरुणीने कोंढवा पोलीस ठाण्यात धाव घेत तक्रार दाखल केली होती. त्यानुसार पोलिसांनी गुन्हा दाखल करून आरोपींचा शोध सुरू केला आहे.