धक्कादायक! आईच्या प्रियकराकडून तरुणीवर बलात्कार; वयाच्या चौदाव्या वर्षापासून लैंगिक अत्याचार

आई व बहिणीला मारून टाकण्याची धमकी देऊन वेळोवेळी जबरदस्ती...

पिंपरी : आईच्या प्रियकराने तरुणीवर लैंगिक अत्याचार केले. तिच्या आई व बहिणीला मारून टाकण्याची धमकी देऊन वेळोवेळी जबरदस्ती केली. बलात्कार प्रकरणी पोलिसांनी 'त्या' प्रियकराला अटक केली. मावळ तालुक्यातील तळेगाव दाभाडे, इंदोरी तसेच भंडारा डोंगराच्या जंगलात २०१४ पासून ते ११ एप्रिल २०२२ या कालावधीत हा प्रकार घडला. 

जनार्दन सोमाजी शितोळे (वय ४०, रा. बहुळ, ता. मावळ), असे अटक केलेल्याचे नाव आहे. याप्रकरणी २१ वर्षीय तरुणीने सोमवारी (दि. ११) तळेगाव एमआयडीसी पोलीस ठाण्यात फिर्याद दिली. पोलिसांनी दिलेल्या माहितीनुसार, आरोपी शितोळे हा फिर्यादी तरुणीच्या आईचा प्रियकर आहे. त्याचे फिर्यादीच्या घरी येणे-जाणे असते. फिर्यादी तरुणी अल्पवयीन असल्यापासून आरोपीने तिच्यावर लैंगिक अत्याचार केले. फिर्यादी तरूणीच्या आई व बहीण यांना मारून टाकण्याची धमकी देऊन वेळोवेळी वेगवेगळ्या ठिकाणी जबरदस्ती करून लैंगिक अत्याचार केले. 

आरोपीने सोमवारी (दि. ११) रात्री दीडच्या सुमारास फिर्यादी तरुणीवर जबरदस्ती केली. या अत्याचाराबाबत तरुणीने आईला सांगितले. त्यामुळे आरोपीने शिवीगाळ करून तरुणीला हाताने मारहाण केली. 

'ती' बोलती झाली म्हणून...

फिर्यादी तरुणी अल्पवयीन असल्यापासून आरोपी तिच्यावर लैंगिक अत्याचार करीत होता. तिला धमकी दिल्यामुळे ती अत्याचार सहन करीत होती. तिच्या वयाच्या चौदाव्या वर्षापासून आरोपी तिच्यावर लैंगिक अत्याचार करीत होता. मात्र ते असह्य झाल्यानंतर तिने आईला सांगितले. त्यामुळे हा धक्कादायक प्रकार उघडकीस आला. त्यानंतर आईसोबत पोलीस ठाण्यात येऊन पीडित तरुणीने तक्रार केली. बलात्कार प्रकरणी तसेच बालकांचे लैंगिक अपराधापासून संरक्षण करण्याच्या कायद्यांतर्गत गुन्हा दाखल करून पोलिसांनी आरोपीला अटक केली.