पुणे रेल्वे स्टेशन येथे झोपलेल्या मुलीवर बलात्कार; नराधमाला १० वर्षाची सक्तमजुरी

रेल्वेस्टेशनवर झोपलेल्या मुलीला शौचालयात नेत बलात्कार करणाऱ्या नराधमाला १० वर्षे सक्तमजुरी आणि सहा हजार रुपये दंडाची शिक्षा सुनावण्यात आली

पुणे : रेल्वेस्टेशनवर झोपलेल्या मुलीला शौचालयात नेत बलात्कार करणाऱ्या नराधमाला १० वर्षे सक्तमजुरी आणि सहा हजार रुपये दंडाची शिक्षा सुनावण्यात आली. प्रमुख जिल्हा न्यायाधीश संजय देशमुख यांनी हा आदेश दिला. दंड न भरल्यास त्याला सहा महिने अतिरिक्त कारावास भोगावा लागेल, असे न्यायालयाने आदेशात म्हटले आहे.

स्वप्नील रवींद्र खोबे (वय ३०, रा. चिंचवड) असे शिक्षा झालेल्याचे नाव आहे. सरकारी पक्षातर्फे ॲड. विलास पटारे यांनी काम पाहिले. महिला पोलीस उपनिरीक्षक एम.एस. कवटीकवार यांनी या प्रकरणाचा तपास केला. ४ जून २०१९ रोजी रात्री २ वाजण्याच्या सुमारास ही घटना घडली. पीडिता बिहारची आहे. ती रेल्वेस्टेशनवर झोपली होती. त्यावेळी "तुझा फोन कुठे आहे' म्हणत त्याने तिला उठविले. फोन सापडला नाही. त्याने तिच्या भाभी आणि भावाच्या फोनवर फोन करून तिला घरी घेऊन जातो आणि चांगले सांभाळतो, असे सांगितले. मात्र, भावाने तिला पोलीस स्टेशनला सोडायला सांगितले. मात्र, त्याने रेल्वे यार्डात दोन रेल्वे गाड्यांच्या शौचालयात नेऊन तिच्यावर बलात्कार केला. बलात्काराच्या वेळी ती ओरडायला लागली असता, तिला मारहाण केल्याचे फिर्यादीत म्हटले आहे. न्यायालयाने १० वर्षे सक्तमजुरी आणि ५ हजार रुपये दंड आणि मारहाण (कलम ३२३) नुसार १ वर्षे कारावास आणि १ हजार रुपये दंडाची शिक्षा सुनावली. दोन्ही शिक्षा एकत्रित भोगायच्या आहेत.