अयोध्या मंदिर परिसर विकासासाठी बड्या कुटुंबाकडून विचारणा

लोकमत न्यूज नेटवर्क

पुणे : “अयोध्येतील प्रस्तावित राममंदिराचा खर्च किती असावा याचा विचार आम्ही केलेला नाही. मंदिराच्या आतील बाजूच्या कामासाठी सुमारे ३०० ते ४०० कोटी खर्च होईल, असा माझा अंदाज आहे. मंदिर परिसराच्या विकासासाठी अंदाजे अकराशे कोटी रुपये लागू शकतील,” असा अंदाज श्री रामजन्मभूमी तीर्थक्षेत्र कोषाध्यक्ष स्वामी गोविंददेव गिरी यांनी वर्तवला. अयोध्या परिसराच्या विकासासाठी एका ‘बड्या’ कुटुंबाने विचारणा केली होती. मात्र, हे नाव मी जाहीर करणार नाही, असे सांगून त्यांनी यासंदर्भात मौन पाळले.

येथे गुुरुवारी (दि. ३१) पत्रकार परिषदेत ते बोलत होते. देशातील सामान्य व्यक्तीच्या दानातून हे मंदिर उभारले जावे, ही बाब सामान्य व्यक्तीच्या रामभक्तीच्या दृष्टीने समाधान देणारी आहे. मंदिरासाठी जनतेकडून दान स्वीकारण्याचा मूळ हेतू हाच आहे, असे स्वामी गोविंददेव यांनी सांगितले.

स्वामी गोविंददेव गिरी यांनी सांगितले, की अयोध्या मंदिरासाठी येत्या मकर संक्रांतीपासून माघ पौर्णिमेपर्यंत (दि. १५ जानेवारी ते २७ फेब्रुवारी) निधी संकलन केले जाणार आहे. यासाठी एक हजार रुपये, शंभर रुपये आणि दहा रुपयांची कुपन छापली आहे. एकूण ५०० कोटी रुपयांची ही कुपन छापलेली आहेत. या माध्यमातून पश्चिम महाराष्ट्रातील ७ जिल्ह्यांतील १० हजार गावांतील ५० लाख कुटुंबांपर्यंत पोहोचण्याचे उद्दिष्ट ठेवण्यात आले आहे. यासाठी दोन हजार संत आणि ५० हजारांहून अधिक स्वयंसेवक कार्य करणार आहेत.

मंदिरासाठी केंद्र सरकार निधी देणार नसून सर्वसामान्य नागरिकांकडून हा निधी गोळा केला जात आहे. परदेशी निधी घेण्याची परवानगी सध्या नाही. ती मिळाल्यास परदेशातील भक्तांचा निधी स्वीकारला जाईल. या अभियानातून अंदाजे हजार ते अकराशे कोटी रुपयांचा निधी जमा होण्याचा अंदाज स्वामी गोविंददेव गिरी यांनी वर्तविला. विश्व हिंदू परिषदेचे मुंबई प्रदेश मंत्री शंकर गायकर, राष्ट्रीय स्वयंसेवक संघाचे प्रांत कार्यवाह डॉ. प्रवीण दबडघाव, प्रांत अभियान प्रमुख संजय मुदराळे , प्रांत अभियान सहप्रमुख मिलिंद देशपांडे, शहर अभियान सहप्रमुख महेश पोहनेरकर या वेळी उपस्थित होते.