Pune: लष्करातील निवृत्त कर्मचाऱ्याचा भरधाव कारच्या धडकेत मृत्यू, स्वारगेट परिसरातील अपघात

या प्रकरणी स्वारगेट पोलिस ठाण्यात कार चालकावर गुन्हा दाखल करण्यात आला आहे....

पुणे : भरधाव कारने दिलेल्या धडकेत लष्करातील निवृत्त कर्मचाऱ्याचा मृत्यू झाला. ही घटना सोमवारी (दि. ४) पहाटे स्वारगेटमधील सॅलिसबरी पार्क भागात घडली. या प्रकरणी स्वारगेट पोलिस ठाण्यात कार चालकावर गुन्हा दाखल करण्यात आला आहे.

शंभूजी लाल (वय ८५, रा.गुलटेकडी) असे मृताचे नाव आहे. याबाबत शशीकला मादीवाना (वय ५७) यांनी फिर्याद दिली. त्यानुसार, पुनावाला गार्डन ते महर्षीनगर पोलिस चौकीकडे जाणाऱ्या रस्त्यावर सोमवारी पहाटे साडेपाचच्या सुमारास ही घटना घडली.

अधिक माहितीनुसार, फिर्यादी या शंभूजी लाल यांच्या केअरटेकर आहेत. शंभूजी लाल हे लष्करात होते. निवृत्तीनंतर ते गुलटेकडी येथील प्लॅटमध्ये वास्तव्यास होते. सोमवारी पहाटे ते घराबाहेर पडले. महर्षीनगर चौकीकडे जाणाऱ्या रस्त्यावरून ते क्रॉसिंग करत असतानाच त्यांना चारचाकीने धडक दिली. यात ते गंभीर जखमी झाले. घटनेनंतर तत्काळ त्यांना रुग्णालयात उपचारासाठी दाखल करण्यात आले. मात्र, डॉक्टरांनी त्यांना मृत घोषित केले. त्यानुसार, स्वारगेट पोलिसांनी गुन्हा दाखल केला असून, कार चालकाचा शोध घेण्यात येत आहे. सहायक पोलिस निरीक्षक राहुल कोळंबीकर पुढील तपास करत आहेत.