निवृत्त पोलीस महासंचालकांच्या घरी चोरी करणाऱ्यांना हरियानातून केले जेरबंद

पुणे : उंड्री येथील न्याती विंड चेंइम्स सोसायटीतील निवृत्त पोलीस महासंचालक राज खिलनानी यांच्यासह दोन घरात घरफोडी करून १ कोटी ३४ लाखांचा ऐवज लंपास करणाऱ्या चोरट्यांना कोंढवा पोलिसांनी हरियानाहून जेरबंद केले आहे. त्यांच्याबरोबरच चोरीचे दागिने विकत घेणाऱ्या सराफालाही अटक करण्यात आली आहे.

राजेशकुमार माहेनलाल सरोज (वय ३३), राकेशकुमार मोहनलाल सरोज (वय ३०, दोघे रा. नवी दिल्ली) आणि सराफ मदनलाल मोहनलाल कुम्हार (वय ३०, रा. राजसंमद, राजस्थान) अशी अटक केलेल्यांची नावे आहेत.

कोंढवा पोलिसांनी याअगोदर मनीषकुमार ऊर्फ सौरभ मदनलाल सरोज (वय १९, रा. वसई, ठाणे) याला अटक केली होती. राजेशकुमार, राकेशकुमार आणि मनीषकुमार हे मूळचे उत्तर प्रदेशातील प्रतापगड जिल्ह्यातील राहणारे आहेत. या तिघांनी मिळून २३ व २४ ऑगस्ट २०२० च्या दरम्यानच्या रात्री न्याती विंडचेंइम्स सोसायटीत शिरून रा. खिलनानी व नैला रिझवी यांच्या घराच्या दरवाजाचे लॉक तोडून आत प्रवेश केला व दोन्ही घरातील मिळून १ कोटी ३४ लाख ९५ हजार ६४१ रुपयांचे डायमंड व सोन्याचे दागिने आणि रोकड चोरून नेली होती.

सीसीटीव्हीवरून कोंढवा पोलिसांनी या तिघांपैकी मनीषकुमार याला अटक केली होती. त्याचवेळी त्याच्या साथीदारांची माहिती मिळाली होती. त्यानुसार कोंढवा पोलिसांनी नवी दिल्ली, उत्तर प्रदेश, हरियाना पोलिसांना या चोरट्यांविषयी माहिती कळविली होती. दरम्यान, हरियाना पोलिसांनी राजेशकुमार आणि राकेशकुमार यांना पकडल्याची माहिती कोंढवा पोलिसांना मिळाली. त्यानंतर कोंढवा पोलिसांचे पथक तातडीने हरियानाला रवाना झाले. त्यांनी दोघांना हरियाना पोलिसांकडून ताब्यात घेतले. त्यांच्याकडे केलेल्या चौकशीत त्याने दागिने मदनलाल कुम्हार या सराफाला विकल्याची माहिती दिली. सराफाला पोलिसांनी अटक करून ८ लाख १० हजार रुपयांची १८० ग्रॅमची सोन्याची लगड तसेच ९० हजार रुपयांची २१ ग्रॅमची लगड जप्त केली आहे. मनीषकुमार याने चोरीच्या पैशांमधून खरेदी केलेला ११ हजार रुपयांचा मोबाईलही जप्त करण्यात आला आहे. गुन्ह्यात वापरलेली कार व घरफोडीचे साहित्य जप्त केले आहे. ही कामगिरी वरिष्ठ पोलीस निरीक्षक सरदार पाटील, पोलीस निरीक्षक शब्बीर सय्यद यांच्या मार्गदर्शनाखाली सहायक पोलीस निरीक्षक चेतन मोरे व त्यांच्या पथकाने केली.