रिक्षा व्यवसायातील गुन्हेगारी मोडून काढणार

लोकमत न्यूज नेटवर्क

पुणे : “शहरात रिक्षाचालकांकडून एका पाठोपाठ एक गुन्हे घडले आहेत. त्यातील आरोपींना पोलिसांनी तातडीने पकडले. रिक्षा व्यवसायात काही गुन्हेगारी वृत्तीचे लोक शिरले आहेत. या गुन्हेगारांचा बीमोड करण्यासाठी पावले उचलणार आहे. याचा प्रत्यय आपल्याला लवकरच येईल. रेल्वे, एसटी, आरटीओ, ट्रॅॅफिक पोलीस, महापालिका, पीएमपी अशा सर्व प्रमुख घटकांशी समन्वयाने दीर्घकालीन उपाय योजना आखणार आहे,” असे पोलीस आयुक्त अमिताभ गुप्ता यांनी सांगितले.

पुणे श्रमिक पत्रकार संघाने आयोजित केलेल्या वार्तालाप कार्यक्रमात बोलत होते. गुप्ता म्हणाले की, महिलांची सुरक्षितता आणि दहशतवाद्यांचा बीमोड याला पोलिसांनी महत्त्व दिले आहे. प्रवासाशी संबंधित ठिकाणांबाबत एसटी, आरटीओ, वाहतूक पोलीस आणि महापालिका अशा वेगवेगळ्या घटकांचा संबंध असतो. या सर्व घटकांशी मी स्वत: संपर्क साधत आहे. गर्दीच्या ठिकाणी होणाऱ्या महिलांवरील दुर्दैवी घटना रोखण्यासाठी या सर्व घटकांशी समन्वय साधून दीर्घकालीन उपाय योजना राबविण्यात येणार आहे.

“सध्या तातडीने आरटीओ व लोहमार्ग पोलिसांच्या मदतीने पुणे रेल्वे स्थानकात रिक्षाचालकांची तपासणी सुरू केली आहे. शहरात अनेक ठिकाणी निर्जन स्थळे आहेत. अशा ठिकाणी महिलांना सुरक्षित वाटेल आणि गुन्हेगारांना संधी मिळू नये, यासाठी उपाय योजना करण्यात येणार आहे. त्यासाठी सीसीटीव्हीचे जाळे वाढविण्यापासून अनेक गोष्टी कराव्या लागणार आहेत,” असे गुप्ता यांनी स्पष्ट केले. पत्रकार संघाचे अध्यक्ष मंगेश कोळपकर, सरचिटणीस सुजित तांबडे यांनी स्वागत केले. नवनाथ शिंदे यांनी सूत्रसंचालन केले.

चौकट

मुंबईपेक्षा पुण्यात दंडात्मक कारवाई अधिक

वाहतूक पोलीस नियमनाऐवजी दंडात्मक कारवाईवर अधिक भर देतात, असे विचारले असता आयुक्त गुप्ता म्हणाले, “कोरोनाच्या काळात मुंबईपेक्षा पुणे पोलिसांनी अधिक कारवाई केली आहे. तब्बल ९० कोटी रुपयांची दंड आकारणी झाली. त्यामुळेच पुण्यात नागरिक मास्कचा वापर अधिक करू लागले व कोरोनावर नियंत्रण आणण्यात यश आले.”

चौकट

‘मेरी नजर में आया तो खतम’

गुन्हेगारांवरील कारवाईबाबत गुप्ता म्हणाले, “छोटे-मोठे गुंड तलवारी, कोयते घेऊन केक कापणे, हिंसक स्टेटस ठेवून दहशत पसरवत होते. समाजातले वातावरण कोणी बिघडवत असेल तर ते खपवून घेणार नाही. अशा गुंडांना शोधून कारवाई केली. गुंडांचे रेकॉर्ड तयार करून त्यांच्यावर एमपीडीए, मोक्का अशा कारवाई करून गुन्हेगारी मोडण्याचा प्रयत्न केला. पुण्यातील वर्षभराच्या कार्याबाबत आपण समाधानी असून अजून काम करायचे आहे.”