ईडी-फिडीला मी घाबरत नाय; ईडी म्हणजे आमच्यासाठी रिक्षाचालक! भाजप खासदार गिरीश बापट यांचं वक्तव्य

पुण्यात आरटीओ कार्यालयासमोर खासदार गिरीश बापट यांचे धरणे आंदोलन

ठळक मुद्देसर्वांनी रिकाम्या ताटल्या, वाट्या हातात घेऊन सरकारचा निषेध केला

पुणे: पुण्यात रिक्षाचालकांना जाहीर केलेली आर्थिक मदत न दिल्यामुळे धरणे आंदोलन करण्यात आले. यावेळी भाजप खासदार गिरीश बापट यांच्या पाठीमागे एक आंदोलनकर्ता येऊन बसला. त्याच्या नावाचा शॉर्ट फॉर्म ''ईडी'' असा होत होता. याचाच संदर्भ घेऊन एक जण म्हणाला, बापट साहेब, "तुमच्या मागे 'ईडी' बसला आहे. हे ऐकताच गिरीश बापट म्हणाले, अशा ईडी फिडीना मी काय घाबरत नाही, असे वक्तव्य भाजप खासदार गिरीश बापट यांनी केले. 

सरकारने संचारबंदीच्या पार्श्ववभूमीवर रिक्षाचालकाना १५०० अनुदान जाहीर केले. ते बँक खात्यात जमा करण्याची घोषणाही केली. पण दोन महिने उलटूनही त्यांना अनुदान देण्यात आलेले नाही. त्यामुळे रिक्षाचालकांवर उपासमारीची वेळ आली आहे. सरकारने तातडीने रिक्षाचालकांना अनुदान द्यावे. या मागणीकरिता खासदार गिरीश बापट यांनी पुणे आरटीओ कार्यालयासमोर धरणे आंदोलन केले.यावेळी उपस्थित सर्वांनी रिकाम्या ताट, वाट्या हातात घेऊन सरकारचा निषेध केला.

यावेळी खासदार बापट म्हणाले, आजपर्यंत असंख्य आंदोलने केले आहे. "ईडी-फिडीला मी काय घाबरत नाय; आणि ईडीला आमच्याकडे येऊन काय मिळणार ? कारण आमच्या खिशात चणे-फुटाणे असतात.आणि आमच्यासाठी ईडी म्हणजे रिक्षाचालक आहे, हे वाक्य उच्चारताच उपस्थितांमध्ये जोरदार हास्याचे कारंजे फुलले. 

राज्य सरकारने रिक्षा चालकांना आर्थिक साहाय्य करण्यासाठी १५०० रुपयांच्या मदतीची घोषणा झाली. मात्र अद्याप रिक्षा चालकांना या सरकारी अनुदानाचा एक रुपया मिळालेला नाही. सरकारने राज्यातील परमिट धारक रिक्षा चालकांना मदतीसाठी जवळपास १८० कोटीचा निधी उपलब्ध करून तो परिवहन विभागाकडे सुपूर्द केला आहे. मात्र, लिंक ओपन न होणे, माहिती अर्धवट आहे असे सांगून परिवहन विभागाकडून रिक्षा चालकांना मदत देण्यास अडसर निर्माण केला जात आहे. ही दिरंगाई लवकरात लवकर दूर व्हावी व प्रशासनाला जाग यावी या करिता हे आंदोलन करत असल्याचे बापट यांनी सांगितले.

यावेळी स्वरदा बापट, महाराष्ट्र रिक्षा पंचायतचे बाबा कांबळे, रिक्षा फेडरेशनचे बापू भावे, वाहतूक सेनेचे एकनाथ ढोले, सावकाश रिक्षा संघटनेचे प्रतिनिधी व अन्य रिक्षाचालक उपस्थित होते.