महामार्ग ते थेऊरगाव रस्त्याच्या डागडुजीस झाली सुरुवात

सुमारे ४ वर्षांपूर्वी तत्कालीन मुख्यमंत्री देवेंद्र फडणवीस यांच्या काळात अष्टविनायक गणपती विकास आराखड्यांतर्गत पुणे - सोलापूर महामार्ग थेऊर गाव ते केसनंद मार्गे लोणी कंद या रस्त्यासाठी १६१ कोटी रुपयांचा निधी मंजूर करण्यात आला होता. तत्कालीन महसूलमंत्री चंद्रकांत पाटील यांच्या उपस्थितीत मोठा गाजावाजा करीत या रस्ताच्या कामाचे भूमिपूजन झाले होते. लोणीकंद ते कोलवडी या दरम्यानचे बहुतांश काम पूर्णत्वाकडे आले असले, तरी थेऊर फाटा ते थेऊर गाव या रस्त्यालगतच्या ५० पेक्षा जास्त शेतकऱ्यांनी रुंदीकरणाला विरोध करून याविरोधात उच्च न्यायालायात याचिका दाखल करुन स्थगिती दिली आहे. यामुळे या रस्त्याचे काम सुमारे दोन वर्षांपासून बंद पडलेले आहे. रस्त्यावर पडलेल्या सुमारे एक ते दीड फुटाचे खड्ड्यांमुळे वाहनचालकांना कसरत करत वाहने चालवावी लागत आहेत. पुणे - सोलापूर महमार्गावरून थेऊर, कोलवडी गावात ये - जा करणाऱ्या नागरिकांना तर रोजच या त्रासास सामोरे जावे लागते. खड्ड्यांमुुळे परिसरात २४ तास धुळीचे साम्राज्य असते. यामुळे अपघाताचे प्रमाण देखील वाढले आहे. अपघाताचे प्रमाण रोखण्यासाठी व या रस्त्यावरून ये-जा करणाऱ्या नागरिकांच्या आरोग्यासाठी या रस्त्याचे लवकर काम पूर्ण करण्यात यावे अशी मागणी या रस्त्यावरून दैनंदिन प्रवास करणारे प्रवासी, वाहनचालक, श्रीगणेशभक्त आणि स्थानिक नागरिकांची आहे.

अशोक पवार ( आमदार, शिरूर - हवेली )

रस्ता बाधित शेतकऱ्यांनी रस्त्याच्या कामास न्यायालयातून स्थगिती आणल्याने या रस्त्याच्या कामास सुरुवात करता येत नव्हती. गेल्या दोन वर्षांच्या काळात रस्त्याची दुरवस्था झाल्याने, नागरिकांना रस्त्यावरून प्रवास करणे अवघड झाले होते. याचा विचार करून सध्या आहे त्याच रस्त्याचे डांबरीकरण करण्याच्या सूचना सार्वजनिक बांधकाम विभागाला दिलेल्या आहेत. तसेच न्यायालयात गेलेल्या शेतकऱ्यांशी चर्चा करून, रस्तारुंदीकरणाच्या कामासाठी मार्ग काढण्याबाबतही सार्वजनिक बांधकाम विभागाच्या अधिकाऱ्यांना सुचवले आहे.

मिलिंद बारभाई ( सार्वजनिक बांधकाम विभागाचे अधीक्षक अभियंता )

आमदार अशोक पवार यांच्या सूचनेनुसार जैसे थे स्थितीतच या रस्त्याची डागडुजी व डांबरीकरणास सुरुवात करण्यात आलेली आहे. रुंदीकरणात जे शेतकरी बाधित होणार आहेत त्यांंच्या समवेत पुढील आठवड्यात चर्चा करून त्यांना योग्य वाटेल असा मार्ग काढण्याचे प्रयत्न सुरू आहेत. यामुळे पुढील काही आठवड्यातच या रस्त्याचे डांबरीकरण व रुंदीकरणही सुरू करण्याचे नियोजन केले आहे.