लोकमत पुणे आवृत्तीचे संपादक संजय आवटे यांना पत्रकारिता भूषण पुरस्कार जाहीर

अखिल म्हसोबा उत्सव मंडई ट्रस्टतर्फे यंदा ज्येष्ठ अभिनेत्री प्रिया बेर्डे, संगीतकार कौशल इनामदार, उद्योजक सौरभ गाडगीळ, युवराज ढमाले यांचीही निवड

पुणे : अखिल म्हसोबा उत्सव मंडई ट्रस्टतर्फे यंदा ज्येष्ठ अभिनेत्री प्रिया बेर्डे, संगीतकार कौशल इनामदार, उद्योजक सौरभ गाडगीळ, युवराज ढमाले, संजय आवटे यांच्यासह विविध क्षेत्रातील मान्यवरांची पुरस्कारांसाठी निवड करण्यात आली आहे. यंदा दि. १४ ते १८ जुलै दरम्यान म्हसोबा उत्सवाचे आयोजन मंडईतील बुरूड आळी येथे करण्यात आले आहे, अशी माहिती ट्रस्टचे विश्वस्त उपाध्यक्ष निवृत्ती जाधव यांनी पत्रकार परिषदेत दिली. यावेळी विश्वस्त अध्यक्ष राहुल सूर्यवंशी, सारिका निंबाळकर, अबोली सुपेकर उपस्थित होते.

निवृत्ती जाधव म्हणाले, यंदाचा व्यापारभूषण पुरस्कार पु. ना. गाडगीळ ज्वेलर्सचे संचालक सौरभ गाडगीळ यांना, उद्योगभूषण पुरस्कार युवराज ढमाले कॉर्पचे संचालक युवराज ढमाले यांना, कलाभूषण पुरस्कार ज्येष्ठ अभिनेत्री प्रिया बेर्डे यांना, संगीतभूषण पुरस्कार प्रख्यात संगीतकार कौशल इनामदार यांना, धार्मिकभूषण पुरस्कार श्री साईबाबा पब्लिक चॅरिटेबल ट्रस्ट शिरगावचे प्रमुख विश्वस्त प्रकाश देवळे यांना आणि पत्रकारिताभूषण पुरस्कार ‘लोकमत’ पुणे आवृत्तीचे संपादक संजय आवटे यांना प्रदान करण्यात येणार आहे.

 स्वारगेट येथील गणेश कला क्रीडा मंच येथे पुरस्कार वितरण सोहळा (दि. १८) जुलै रोजी सकाळी १०:३० वाजता होणार आहे. या कार्यक्रमाला ज्येष्ठ सामाजिक कार्यकर्ते डॉ. बाबा आढाव, ज्येष्ठ साहित्यिक रामदास फुटाणे उपस्थित राहणार आहेत. तसेच यावेळी महिला बचतगट स्पर्धांचे पारितोषिक वितरण शिवसेनेच्या उपनेत्या सुषमा अंधारे, अभिनेत्री सुप्रिया पाठारे, ज्ञानदा रामतीर्थकर यांच्या हस्ते होणार आहे.