पाच वर्षीय शाळकरी मुलीवर स्कूल बस चालकाचा लैंगिक अत्याचार; खेड तालुक्यातील घटना

मुलीच्या वडिलांनी खेड पोलिस ठाण्यात फिर्याद दिली आहे...

राजगुरुनगर (पुणे) : विद्यार्थी वाहतूक करणाऱ्या गाडी चालकाने ५ वर्षीय बालिकेवर लैंगिक अत्याचार केल्याची घटना उघडकीस आली आहे. गौतम भांबुरे (रा. भांबुरवाडी ता.खेड ) असे आरोपीचे नाव असून खेड पोलिसांनी अटक केली आहे. याबाबत मुलीच्या वडिलांनी खेड पोलिस ठाण्यात फिर्याद दिली आहे.

याबाबत खेड पोलिसांनी दिलेल्या माहितीनुसार, पीडित ५ वर्षीय मुलगी राजगुरूनगर येथे खाजगी शाळेत आहे. आरोपी गौतम भांबुरे हा गाडीत शाळकरी मुलांना खाजगी शाळेत ने-आण करण्याचे काम करीत होता. (दि. १२) रोजी आरोपी भांबुरे पिडित मुलीला घरी सोडविण्यासाठी जात असताना राजगुरूनगर शहरालगत भांबुरवाडी घाटात इको गाडी थांबवून ५ वर्षीय पिडित मुलीसोबत लैंगिक चाळे केले.

आरोपीने त्याच्या प्रायव्हेट पार्टला पीडित मुलीला बळजबरीने हात लावण्यास सांगून अश्लील वर्तन केले. याबाबत घरी कुणाला सांगायचे नाही असे ओरडून मुलीला सांगितले. मुलीने घरी आल्यानंतर आई-वडीलांना घडलेला प्रकार सांगितला. पोक्सो कायद्यानुसार आरोपीला खेड पोलिसांनी अटक केली असून पुढील तपास सहाय्यक पोलिस निरिक्षक नवनाथ रानगट करीत आहेत.