पहिल्या लाटेच्या तुलनेत दुसऱ्या लाटेत सर्वच वयोगटातील रुग्णसंख्या दुप्पट

डमी - ७७८

पुणे : शहराने कोरोनाची पहिली लाट गेल्यावर्षी ऑगस्ट-सप्टेंबर या दोन महिन्यांत आणि दुसरी लाट यावर्षी मार्च-एप्रिल महिन्यात सर्वाधिक अनुभवली. पहिल्या लाटेत ज्येष्ठ नागरिक आणि सहव्याधी असलेल्या रुग्णांना मोठ्या प्रमाणात संसर्ग झाला. दुसऱ्या लाटेने तरुणांमध्ये संसर्ग जास्त प्रमाणात पसरला असला तरी, सर्वच वयोगटांना पहिल्या लाटेच्या तुलनेत प्रचंड फटका बसला. तिसऱ्या लाटेमध्ये लहान मुलांना जास्त संसर्ग होण्याची शक्यता व्यक्त केली जात आहे. तिसरी लाट रोखण्याच्या दृष्टीने वेगवान लसीकरण हाच एकमेव उपाय असल्याचे तज्ज्ञांचे म्हणणे आहे.

पहिल्या लाटेच्या तुलनेत दुसऱ्या लाटेतील रुग्णांच्या तुलनात्मक आकडेवारीतून यावर्षी रुग्णसंख्येने गाठलेला उच्चांक लक्षात येतो. सर्वच वयोगटातील रुग्णांची संख्या दुसऱ्या लाटेत दुप्पट झाली. पहिल्या लाटेत ज्येष्ठांना मोठ्या प्रमाणात संसर्ग झाला, मात्र तरुणांची संख्या दोन्ही लाटांमध्ये धडकी भरवणारी होती. विषाणूमध्ये झालेले डबल म्युटेशन, संसर्गाचा वाढलेला वेग आणि झपाट्याने होणारा प्रसार यामुळे दुसरी लाट जास्त नुकसान करणारी ठरली.

पहिली लाट ओसरल्यावर कोरोना गेला, असा सर्वांचाच समज झाला. त्यामुळे आंतरनियम, मास्कचा वापर, सॅनिटायझरचा वापर जवळपास बंद झाला होता. आरोग्य यंत्रणाही गाफील राहिली. त्याचवेळी अचानक दुसरी लाट येऊन धडकल्याने सर्वच स्तरांवर ताण निर्माण झाला. पहिल्या लाटेत आपल्याकडे साथीवर मात कशी करायची, याचे उत्तर आपल्याकडे नव्हते. मात्र, आता लसीकरणाच्या रूपाने उत्तर मिळाले आहे. त्यामुळे सर्वच वयोगटांचे वेगाने लसीकरण करण्याची गरज निर्माण झाली आहे. तिसरी लाट रोखण्यासाठी बालरोगतज्ज्ञांचा टास्क फोर्सही स्थापन करण्यात आला आहे. मुलांकडे पालकांनी विशेष लक्ष द्यावे, अशा सूचना करण्यात आल्या आहेत.

-------

कोरोना पॉझिटिव्ह (पहिली लाट)

वयोगट ऑगस्ट सप्टेंबर एकूण

० ते १० २३०८ २४१६ ४७२४

११ ते २० ३३४५ ३६५७ ९१५४

२१ ते ३० ७६०८ ९१५४ १६७६२

३१ ते ४५ १२९४१ १५८८६ २८८२७

४६ ते ६० ९०४५ ११४११ २०४८६

६१ ते ७५ ४७५९ ५९७६ १०७३५

७६ ते ९० १०६१ १३५१ २४१२

९१पेक्षा जास्त ५१ ६७ ११८

-----

कोरोना पॉझिटिव्ह (दुसरी लाट)

वयोगट मार्च एप्रिल एकूण

० ते १० २३८१ ६३४२ ८७२३

११ते २० ४५२६ ११२७६ १५८०२

२१ ते ३० १२९५५ ३१२१० ४४१६५

३१ ते ४५ २१५४३ ५१४११ ७२९५४

४६ ते ६० १४३७९ २९०५८ ४३४३७

६१ ते ७५ ८५९८ १६५३९ २५१३७

७६ ते ९० २१६२ ४१४४ ६३०६

९१पेक्षा जास्त ९६ १९६ २९३

----

तिसऱ्या लाटेची तयारी

संभाव्य तिसऱ्या लाटेकरिता महानगरपालिकेचे एकूण ७ डीसीएच, ४ डीसीएचसी तयार आहेत. यात एकूण २२८७ बेड्स असून, १७०७ ऑक्सिजनसह, २७ ऑक्सिजनविरहित बेड्स आहेत. तसेच २४५ आयसीयू व्हेंटिलेटरसह व १९८ आयसीयू व्हेंटिलेटररहित बेड्स उपलब्ध आहेत. खासगी रुग्णालयांकडे एकूण ४३ डीसीएच व १५१ डीसीएचसी कार्यरत आहेत. यात ८३०७ एकूण बेड्स असून ५३५९ ऑक्सिजनसह व १९०७ ऑक्सिजनविरहित बेड्स आहेत. ५८५ आयसीयू व्हेंटिलेटरसह व ४५६ आयसीयू व्हेंटिलेटररहित बेड्स उपलब्ध आहेत. आवश्यकता भासल्यास बेडसंख्या वाढवण्यासाठी खासगी रुग्णालयांना सूचना देण्यात आल्या आहेत. सीईओपी जम्बो कोविड सेंटर येथे बालकांसाठी विशेष कक्ष स्थापन करण्यात आला आहे. राजीव गांधी रुग्णालय येथे पेडियाट्रिक डीसीएचमध्ये रूपांतर करण्याचे काम सुरू आहे.