वाड्याला लागलेल्या आगीत ज्येष्ठाचा हाेरपळून मृत्यू; पुण्याच्या भवानी पेठेतील घटना

जवानांनी वाड्याची पाहणी केली असता वाड्यातील स्वच्छतागृहात ज्येष्ठ नागरिक बेशुद्धावस्थेत सापडले

पुणे: भवानी पेठेतील पालखी विठोबा चौकात जुन्या वाड्याला गुरुवारी रात्री लागलेल्या आगीत एका ज्येष्ठ नागरिकाचा होरपळून मृत्यू झाला. नीलेश ठक्कर (७०, रा. मणीभवन वाडा, पालखी विठोबा चौक, भवानी पेठ) असे मृत्युमुखी पडलेल्या ज्येष्ठाचे नाव आहे. परिसरातील रहिवाशांनी ठक्कर हे एकटेच राहत असल्याची माहिती अग्निशमन विभागाला दिली.

पालखी विठोबा चौकात मणीभवन हा जुना लाकडी दुमजली वाडा आहे. सध्या या वाड्यात ठक्कर यांच्याशिवाय कोणी राहत नव्हते. गुरुवारी रात्री साडेअकराच्या सुमारास वाड्यात अचानक आग लागली. या घटनेची माहिती मिळताच अग्निशमन दलाच्या मुख्य केंद्रातील बंब घटनास्थळी दाखल झाले. केंद्रप्रमुख गजानन पाथ्रुडकर, राजेश जगताप, प्रदीप खेडेकर यांच्या मार्गदर्शनाखाली जवानांनी पाण्याचा मारा करून अर्ध्या तासात आग आटोक्यात आणली. जवानांनी वाड्याची पाहणी केली तेव्हा वाड्यातील स्वच्छतागृहात नीलेश ठक्कर बेशुद्धावस्थेत सापडले. जवानांनी त्यांना तातडीने ससून रुग्णालयात दाखल केले असता, उपचारादरम्यान त्यांचा मध्यरात्री मृत्यू झाला.