पाण्याच्या टाकीत पडून सात वर्षीय बालकाचा मृत्यू

खेळताना पाण्याच्या टाकीत पडल्यामुळे एका सात वर्षीय बालकाचा मृत्यू झाला. ही घटना घरकुल चिखली येथे मंगळवारी सायंकाळी घडली.

ठळक मुद्देपोलिसांनी पाण्याच्या टाकीत उतरून शोध घेतला असता अथर्व बेशुद्ध अवस्थेत आढळून आला.

पिंपरी : खेळताना पाण्याच्या टाकीत पडल्यामुळे एका सात वर्षीय बालकाचा मृत्यू झाला. ही घटना घरकुल चिखली येथे मंगळवारी सायंकाळी घडली. अथर्व नितीन पाटील असे मृत्युमुखी पडलेल्या बालकाचे नाव आहे. निगडी पोलिसांनी दिलेल्या माहितीनुसार, अथर्व हा इमारतीबाहेर खेळत होता. त्यावेळी त्याची आईसुद्धा जवळ होती. खेळताना मुलगा अचानक दिसेनासा झाला. आजूबाजूला पालकांनी शोध घेण्याचा प्रयत्न केला. घरकुलमधील इतर नागरिकही अथर्वच्या शोधासाठी धावाधाव करू लागले. पोलिसांना माहिती मिळाल्यानंतर पोलीस घटनास्थळी दाखल झाले. त्यांनी मुलाचा शोध घेण्यास सुरुवात केली. घरकुलच्या बाजूला असलेल्या एका बांधकाम साइटवर पाण्याच्या टाकीत चप्पल तरंगताना दिसून आली. पोलिसांनी पाण्याच्या टाकीत उतरून शोध घेतला असता अथर्व बेशुद्ध अवस्थेत आढळून आला. त्याला वायसीएम रुग्णालयात नेले असता उपचारापूर्वीच त्याचा मृत्यू झाल्याचे डॉक्टरांनी घोषित केले. वरिष्ठ पोलीस निरीक्षक विजयकुमार पळसुले यांनी अकस्मात मृत्यू म्हणून नोंद केली.