पुण्यातील धक्कादायक घटना! मांजरी खुर्द येथे पाच जणांकडून तीक्ष्ण हत्याऱ्याने वार करत तरुणाचा खून

हातउसने पैसे परत देण्यावरुन मध्यस्थी करायला गेलेल्या तरुणाच्या बाबतीत घडला हा प्रकार

ठळक मुद्देपैसे परत का करत नाही, असे विचारण्यावरून झाला वाद पाच जणांकडून तरुणावर तीक्ष्ण हत्याऱ्याने वार

पुणे : मित्राचे हात उसने घेतलेले पैसे परत का करत नाही, असे विचारायला गेलेल्या मध्यस्थ तरुणावर तीक्ष्ण हत्याराने वार करत खून करण्यात आला. हा प्रकार मांजरी खुर्द येथील स्मशानभूमीजवळ आरोपींच्या घरासमोर रविवारी रात्री ११ वाजता घडला. 

विकास लक्ष्मण सोनवणे (वय ३१, रा. मांजरी खुर्द) असे खुन झालेल्या तरुणाचे नाव आहे. याप्रकरणी लोणीकंद पोलिसांनी पाच जणांवर खुनाचा गुन्हा दाखल केला आहे. 

याबाबत लोणीकंद पोलीस ठाण्याचे वरिष्ठ पोलीस निरीक्षक गजानन पवार यांनी सांगितले की, विकास सानवणे हा इलेक्ट्रिशन म्हणून काम करत होते. आरोपींनी विकास याचा मित्र गायकवाड याच्याकडून हातउसने पैसे घेतले होते. आरोपी हे पैसे परत करत नसल्याने रविवारी सायंकाळी त्यांच्यात वाद झाला होता.

हे समजल्यावर विकास रात्री ११ वाजण्याच्या सुमारास आरोपींच्या घरी गेला. त्यांना पैसे परत का करत नाही, अशी विचारणा केली. त्यावेळी आरोपींबरोबर वाद झाला. त्यातून पाच जणांनी विकासवर वार करुन त्याचा खून केला. लोणीकंद पोलीस अधिक तपास करीत आहेत.