पैसे देण्यास नकार देताच झाडल्या गोळ्या; पुण्यातील घटना! 

आरोपी सहा महिन्यांपूर्वी खुनाच्या गुन्ह्यातून येरवडा कारागृहातून बाहेर आला आहे.   

पुणे : हॉटेलमध्ये पैशांची मागणी करून पैसे न दिल्याने सराईतांनी एकावर गोळीबार केल्याची घटना गुरुवारी (ता. १८) मध्यरात्री येरवडा भागात घडली. या गोळीबारात विकी राजू चंडालिया (रा. जय जवान नगर, येरवडा) हा तरुण जखमी झाला आहे. या प्रकरणी सात आरोपींविरुद्ध येरवडा पोलिसांनी गुन्हा दाखल केला आहे. शहरात सलग चौथ्या दिवशी गोळीबार झाला आहे. 

आकाश चंडालिया, अक्षय चंडालिया, अमन चंडालिया, अभिषेक चंडालिया (सर्व जण रा. रेंजहिल्स, पुणे), सुशांत कांबळे (रा. पर्णकुटी सोसायटी, येरवडा), संदेश जाधव आणि संकेत तारू (दोघे रा. जय जवान नगर, येरवडा) अशी आरोपींची नावे आहेत. आरोपी आकाशवर यापूर्वी गुन्हे दाखल आहेत. तो सहा महिन्यांपूर्वी खुनाच्या गुन्ह्यातून येरवडा कारागृहातून बाहेर आला आहे.