...म्हणून मग रोहित पवारांनीच काढला 'तो' सेल्फी..! अन् 'मावशीं'च्या आनंदाला उरला नाही पारावार

रोहित पवार हे सोशल मीडियावर देखील चांगलेच सक्रिय असलेले देखील आपण पाहत असतो..

पुणे : कर्जत-जामखेड मतदारसंघाचे राष्ट्रवादी काँग्रेस पक्षाचे आमदार रोहित पवार हे अनेकदा या ना त्या कारणाने चर्चेत असतात. राजकीय जीवनासोबतच ते सोशल मीडियावर देखील चांगलेच सक्रिय असलेले देखील आपण पाहत असतो. त्यांचे विविध सामाजिक उपक्रमांची माहिती असो वा नरेंद्र मोदी यांच्यासह भाजपा नेत्यांवर सोडलेले टीकास्त्र ही त्यामागची काही कारणे आवर्जून सांगता येतील. पण यावेळी रोहित पवार हे पुण्यातील एका आगळ्यावेगळ्या प्रसंगामुळे कौतुकाचा विषय ठरले आहे. 

रोहित पवार हे आपल्या वैयक्तिक कारणास्तव पुण्यातील एका हॉस्पिटलमध्ये आले होते. काम पूर्ण झाल्यावर ते आपल्या गाडीत बसून पुन्हा एकदा प्रवासाला लागणार तेवढ्यात तेथे रुग्णालयात काम करणाऱ्या एका मावशींनी त्यांना आवाज दिला. कामाची धावपळ पाठीमागे असताना देखील त्यांनी त्या मावशींचा आवाज ऐकल्यावर आपली गाडी ताबडतोब थांबवली. त्यानंतर मावशी जवळ आल्यावर  त्यांची व कुटुंबाची आस्थेने विचारपूस केली. परंतु, हे सर्व झाल्यावर मावशींनी पवार यांच्यासोबत सेल्फी घेण्याबाबत त्यांना विचारणा केली. यावर पवार यांनी तात्काळ होकार दिला. पण खरी अडचण येथून पुढे निर्माण झाली. कारण काही केल्या त्या मावशींना सेल्फी घेता येईना. त्यामुळे त्यांना काही वेळ सुचेनाच काय करावे ते. तेवढ्यात रोहित पवार यांनी स्वतः त्यांचा मोबाईल घेत सेल्फी फोटो काढला. त्यानंतर त्या मावशींच्या आनंदाला पारावार उरला नाही. त्यांच्या चेहऱ्यावर झळकणारा आनंद पवार यांना देखील सुखावणारा होता. 

राजकीय व्यक्ती म्हटलं की पाठीशी धावपळ ही ओघाने ठरलेलीच असते. त्याला रोहित पवार हे देखील अपवाद नाही. पण रुग्णालयातील भेटीनंतर एवढ्या गडबडीत सुद्धा त्यांनी त्या मावशींना वेळ देत सेल्फी घेतला. हाच फोटो सोशल मीडियावर व्हायरल होतो आहे. अर्थात नेहमी आपल्या कामा दरम्यान येणारे छोटे मोठे चांगले अनुभव सोशल मीडियाच्या माध्यमातून समाजासमोर पवार ठेवत असतात. उमेश मुळे यांनी त्यांच्या फेसबुक पेजवर याविषयीची पोस्ट लिहिताना रोहित पवार यांच्या सोबतचे त्या मावशींचे फोटो देखील शेअर केले आहे. रोहित पवार यांनी जपलेल्या सामाजिक बांधिलकीचा हा क्षण त्या मावशींच्या जीवनात एक अविस्मरणीय आठवण देऊन गेला.