लोणावळ्यात मुलानेच केला वडिलांचा खून; पोलिसांनी आवळल्या आरोपीच्या मुसक्या

भांडणात मुलाने वडीलांचा गळा आवळून केला खून...

लोणावळा : वडील व मुलगा यांच्यात झालेल्या भांडणानंतर मुलानेच वडिलांचा गळा आवळून खून केला व पलायन केले होते. याबाबत मयताच्या भावाने दिलेल्या फिर्यादीवरून लोणावळा ग्रामीण पोलीस ठाण्यात खूनाचा गुन्हा दाखल करण्यात आला होता.

पवनानगर विभागातील जवण नं. ३ या गावामध्ये १४ ते १७ जुलै दरम्यान ही घटना घडली होती. या घटनेतील मयत व्यक्ती खंडू ऊर्फ गोट्या भिकाजी गिरंजे (वय ६०, रा. जवण नं. ३, पवनानगर, ता. मावळ) यांची व त्यांचा मुलगा शेखर खंडू ऊर्फ गोट्या गिरंजे (वय ३५, रा. खडकपाडा, कल्याण पश्चिम, जि. ठाणे, मूळ राहणार जवण नं. ३) यांच्यात दारू पिऊन झालेल्या भांडणात शेखर याने वडील खंडू ऊर्फ गोट्या गिरंजे यांचा गळा आवळून खून केला असल्याची फिर्याद सखाराम भिकाजी गिरंजे (वय ६७, रा. जवण नं. ३) यांनी दिली होती.

या फिर्यादीच्या आधारे व पुणे ग्रामीणचे पोलीस अधीक्षक डाॅ. अभिनव देशमुख, अपर पोलीस अधीक्षक मितेश घट्टे, लोणावळा उपविभागीय अधिकारी भाऊसाहेब ढोले यांच्या मार्गदर्शनाखाली लोणावळा ग्रामीण पोलीस ठाण्याचे सहायक पोलीस निरीक्षक नीलेश माने, सहायक पोलीस निरीक्षक सचिन राऊळ, सहायक पोलीस उपनिरीक्षक युवराज बनसोडे, पोलीस अंमलदार संतोष शेळके, नितीन कदम, शरद जाधवर, केतन तळपे, संदीप बोराडे, प्रवीण उकिर्डे यांच्या पथकाने मोठ्या शिताफीने शेखर यास विश्वासात घेऊन तपास केला असता, त्याने गुन्ह्याची कबुली दिली. याप्रकरणी सहायक पोलीस निरीक्षक नीलेश माने पुढील तपास करत आहे.